Skip to content
କଟକ: କମିସନରେଟ ପୁଲିସ କଟକ କନ୍ଦରପୁର ଡକାୟତି ଘଟଣାର ପର୍ଦାଫାଶ କରିଛି। ଏହି ମାମଲା ଡକାୟତ ଗ୍ୟାଙ୍ଗର ମୁଖ୍ୟ ଅଭିଯୁକ୍ତ ମନୋଜ ମହାରଣା ଓରଫ ମଙ୍ଗୁକୁ ଦୁଇ ଦିନ ତଳେ ପୁଲିସ ଏନକାଉଣ୍ଟର କରିଥିବା ବେଳେ ଆଜି ଏହି ଗ୍ୟାଙ୍ଗର ଅନ୍ୟ ୭ ଜଣ ଅଭିଯୁକ୍ତଙ୍କୁ କନ୍ଦରପୁର ଆଇଆଇସି ବିପିନ ବିହାରୀ ହୋତା ଓ ତାଙ୍କର ସହଯୋଗୀମାନ ଗିରଫ କରିବାରେ ସଫଳ ହୋଇଛନ୍ତି । ପରେ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି | ଅଭିଯୁକ୍ତମାନେ ହେଲେ କଟକ ଟାଙ୍ଗୀ ଥାନାରେ ଅନ୍ତର୍ଗତ ସାନ କେଶପୁର ଅଂଚଳର ବ୍ରହ୍ମାନନ୍ଦ ରାଉତ ଓରଫ ଚିକୁ, ଗଞ୍ଜାମ ଅଞ୍ଚଳର ସନ୍ତୋଷ କୁମାର ବେହେରା, କନ୍ଦରପୁର ଅଂଚଳର ଉଦୟ କୁମାର ଭୋଇ ଓରଫ ଉଦ, ଗଞ୍ଜାମ ଅଞ୍ଚଳର ରାମ ଚନ୍ଦ୍ର ସାହୁ ଓରଫ ବାବୁ, କେଉଁଝର ଅଞ୍ଚଳର ହେମାନନ୍ଦ ମୋଦି ଓରଫ ପପୁ ଓ ଗହ୍ମାଡିହା ଅଞ୍ଚଳର ସେକ ଇଲିଆସ ଓରଫ ସେକ ବାବା, ଦରଘାବଜାର କେଶରପୁର ଅଞ୍ଚଳର ଫିରୋଜ ଖାନ |
ଗତ ୬ ତାରିଖ ଦିନ କନ୍ଦରପୁର ମତଗଜପୁର ଅଂଚଳର ଅଳଙ୍କାର ବ୍ୟବସାୟୀ ବିକାଶ ପାତ୍ରଙ୍କ ଉପରକୁ ଗୁଳି ଚଳାଇ ଏହି ଗ୍ୟାଙ୍ଗ ଲୁଟ କରି ଥିଲା ଏବଂ ବିକାଶଙ୍କ ଠାରୁ ପ୍ରାୟ ୫ ଲକ୍ଷ ଟଙ୍କା ମୂଲ୍ୟର ଅଳଙ୍କାର ଓ ୨୫ ହଜାର ଟଙ୍କା ନଗଦ ଲୁଟ ହୋଇ ଥିବା ଅଭିଯୋଗ ହୋଇ ଥିଲା। ଗିରଫ ଅଭିଯୁକ୍ତଙ୍କ ଠାରୁ ଦୁଇଟି ସୁନା ଚୁଡ଼ି, କିଛି ରୂପା ଅଳଙ୍କାର, ୩ଟି ଅଫୁଟା ଗୁଳି, ଏକ ଆପାଚି ମୋଟର ସାଇକେଲ (ନଂ ଓଡ଼ି୦୫ଟି ୧୩୧୬) ଜବତ ହୋଇଛି । କଟକ ଡିସିପି ପିନାକ ମିଶ୍ର ଗଣମାଧ୍ୟମର ପ୍ରତିନିଧିଙ୍କୁ କହିଛନ୍ତି, ମଙ୍ଗୁ ଏକ ଗ୍ୟାଙ୍ଗ ତିଆରି କରି ଅପରାଧୀକ କାର୍ଯ୍ୟକଳାପ କରିବା ପାଇଁ ଯୋଜନା ପ୍ରସ୍ତୁତ କରି ଥିଲା ଓ ଲୁଟ୍ କୁ ରୂପ ଦେଇଥିଲା |
