ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଶୁକ୍ରବାର ଡାକ୍ତରଖାନା ଓ ଶିକ୍ଷାନୁଷ୍ଠାନଗୁଡ଼ିକ ପାଇଁ ୟୁପିଆଇ ଦେୟ ସୀମା ୧ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି କରିବାକୁ ଘୋଷଣା କରିଛି।
ଡିସେମ୍ବର ଦ୍ୱିମାସିକ ମୁଦ୍ରାନୀତି ଘୋଷଣା କରି ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି ଯେ ୟୁନିଫାଇଡ୍ ପେମେଣ୍ଟ୍ ଇଣ୍ଟରଫେସ୍ (ୟୁପିଆଇ) କାରବାରର ବିଭିନ୍ନ ବର୍ଗର ସୀମା ସମୟ ସମୟରେ ସମୀକ୍ଷା କରାଯାଇଛି। ଏବେ ହସ୍ପିଟାଲ ଓ ଶିକ୍ଷାନୁଷ୍ଠାନଗୁଡ଼ିକୁ ଦେୟ ଦେବା ପାଇଁ ୟୁପିଆଇ ଟ୍ରାଞ୍ଜାକସନ୍ ସୀମା କୁ ୧ ଲକ୍ଷ ଟଙ୍କାରୁ ୫ ଲକ୍ଷ ଟଙ୍କାକୁ ବୃଦ୍ଧି କରିବାକୁ ପ୍ରସ୍ତାବ ରହିଛି।
ଏହା ଦ୍ବାରା ହସପିଟାଲ ଗୁଡ଼ିକରେ ପେମେଣ୍ଟ କରିବା ସମୟରେ ସୁବିଧା ହେବ । କାରଣ ଜରୁରୀ ସମୟରେ ଅଧିକାଂଶ ହସପିଟାଲ ଚେକ ନେବାକୁ ରାଜି ହୁଅନ୍ତି ନାହିଁ । ପୁଣି ହଠାତ୍ ଅଧିକ ପରିମାଣରେ ନିଗଦ ଟଙ୍କା ଯୋଗାଡ଼ କରିବା ସମ୍ଭବ ହୁଏ ନାହିଁ । ଏବେ ନେଣଦେଣ ଲିମିଟ୍ ବଢିବା ପରେ ଏହି ସମସ୍ୟାର ସମାଧାନ କରିବ ୟୁପିଆଇ ।
ବର୍ଦ୍ଧିତ ସୀମା ଗ୍ରାହକଙ୍କୁ ଶିକ୍ଷା ଏବଂ ସ୍ୱାସ୍ଥ୍ୟ ସେବା ଉଦ୍ଦେଶ୍ୟରେ ଅଧିକ ପରିମାଣର ୟୁପିଆଇ ପ୍ରଦାନ କରିବାରେ ସାହାଯ୍ୟ କରିବ। ସେ ଆହୁରି ମଧ୍ୟ କହିଛନ୍ତି ଯେ ବାରମ୍ବାର ପେମେଣ୍ଟ କରିବା ପାଇଁ ଗ୍ରାହକଙ୍କ ମଧ୍ୟରେ ଇ-ମ୍ୟାଣ୍ଡେଟ୍ ଲୋକପ୍ରିୟ ହୋଇଛି।