ଝଙ୍କଡ଼, ୧/୧୦,: ସାର୍ବଜନୀନ ଶାରଦୀୟ ପାର୍ବଣ ପୂଜା ର ଉଦଯାପନ ଉତ୍ସବ ଉପଲକ୍ଷେ , ମହାଷ୍ଟମୀ ଦିନ ରାତି ୩ ଟା ବେଳେ, ପ୍ରସିଦ୍ଧ ପ୍ରାଚୀନ ଶକ୍ତିପୀଠ, ତଥା ମା ନୀଳସରସ୍ଵତୀ ଙ୍କ ତନ୍ତ୍ରପୀଠ ଭାବେ ପ୍ରତିଷ୍ଠିତ ଏହି ପୀଠ ରେ କେଉଁ ଆବହମାନ କାଳରୁ ବଳିପ୍ରଥାର ପ୍ରଚଳନ ହୋଇ ଆସୁଥିଲା। ଅଷ୍ଟମୀ ଓ ନବମୀ ର ସନ୍ଧି କ୍ଷଣ ରେ ଏହି ଗୁପ୍ତ ପୂଜା ହେଉଥିବାରୁ ଏହାକୁ ସନ୍ଧିପୂଜା ନାମରେ ଅଭିହିତ କରାଯାଇଥାଏ। ଏହି ସନ୍ଧିପୂଜା ସମୟରେ ଏକ ଜୀବନ୍ତ ମହିଷ କୁ ବଧ କରାଯାଇ, ତାର କଟାମୁଣ୍ଡ କୁ ଗୋଟିଏ କାଠଥାଳି ରେ ରଖାଯାଇ, ମଝି ଦେଉଳକୁ ନିଆଯାଏ। ତାର ରକ୍ତ କୁ ଚଉଷଠୀ ଯୋଗ୍ନୀ, ନବକୋଟି କାତ୍ୟାୟନୀ ଓ ଚଣ୍ଡୀ ଚାମୁଣ୍ଡା ମାନଙ୍କୁ ଅର୍ପଣ କରାଯାଏ। ମାତ୍ର,୧୯୪୬ ମସିହାରେ, ତିର୍ତ୍ତୋଲ ର ପୂର୍ବତନ ବିଧାୟକ, ବିଶିଷ୍ଟ ସ୍ବାଧିନତା ସଂଗ୍ରାମୀ ତଥା ସର୍ବ ଭାରତୀୟ ଶ୍ରମିକ ନେତା, ନିଶାମଣି ଖୁଣ୍ଟିଆ ଙ୍କ ଗଣ ଆନ୍ଦୋଳନ ଫଳରେ ଏହି ବଳିପ୍ରଥା ର ବିଲୁପ୍ତ ଘଟିଛି। ଏଥିପାଇଁ ସେବାୟତ ମାନେ ବଳି ଚାଲୁ ରଖିବାକୁ ଅଡି ବସିଥିବା ବେଳେ, ଖୁଣ୍ଟିଆ ଓ ତାଙ୍କର ସମର୍ଥକ ମାନେ ବଳିବନ୍ଦ କରିବା ପାଇଁ ଦାବୀ କରିଥିଲେ। ତେଣୁ ଏହି ତର୍କସଭାରେ କେହି କାହାର ଯୁକ୍ତି କୁ ଖଣ୍ଡନ କରି ପାରିଲେ ନାହିଁ। ଶେଷରେ ଉଭୟ ପକ୍ଷର ସହମତିରେ , ମାଆ ସାରଳା ଙ୍କ ନିର୍ଦ୍ଦେଶ କ୍ରମେ ସ୍ଥିର ହେବ ବୋଲି ନିଷ୍ପତି ଗ୍ରହଣ କରାଯାଇଥିଲା। ଦୁଇଟି ତାଳପତ୍ର ରେ, ମୋର ନିର୍ଦ୍ଦେଶ “ବଳି ବନ୍ଦ ହେଉ” ଓ ମୋର ନିର୍ଦ୍ଦେଶ “ବଳି ଚାଲୁରହୁ” ବୋଲି, ଲେଖାଗଲା। ମାଆଙ୍କ ବଡ଼ପଣ୍ଡା ସେହି ଦୁଇଟି ତାଳପତ୍ର କୂ ମାଆଙ୍କ ଉପରେ ରଖିଦେଲେ। ପହୁଡ଼ ପଡ଼ିଲା, ଦ୍ଵାରପଥ କବାଟ ରେ ତାଲା ପଡ଼ିଲା, ଉଭୟ ପକ୍ଷର ଯଉମୁଦ ଶିଲ ମରାଗଲା। ଅପରାହ୍ନ ୩ ଟା ବେଳେ ମାଆଙ୍କ ପହୁଡ଼ ଖୋଲାଗଲା ସମସ୍ତଙ୍କ ଉପସ୍ଥିତିରେ, ବଡ଼ପଣ୍ଡା ମାଆଙ୍କ ସିଂହାସନ ପଖକୁ ଗଲେ।ସେବାୟତ ମାନେ ଚାହୁଁ ଥିଲେ, ବଳି ଚାଲୁରହୁ। କାରଣ ସେହି ବଳିର ରକ୍ତକୁ ଡେଉଁରିଆ, କବଚ, ଓ ତାବିଜ ରେ ପୁରାଇ ଭକ୍ତ ମାନଙ୍କୁ ବିକ୍ରିକଲେ ସେବାୟତ ମାନଙ୍କର ଅର୍ଥ ଉପାର୍ଜନ ହେବ। ତେଣୁ ଯେଉଁ ତାଳପତ୍ରରେ ବଳି ଚାଲୁ ରହିବ ବୋଲି ଲେଖାଥିଲା ସେଗୋଟିକ ମାଆଙ୍କ ଶ୍ରୀବିଗ୍ରହ ଉପରେ ଏମିତି ରଖିଦେଲେ ଯେ, ଯେପରି ଟିକେ ପବନ ହେଲେ ତାହା ତଳକୁ ଖସି ପଡିବ। ଆଉ ଯେଉଁଥିରେ ବଳି ବନ୍ଦ ବୋଲି ଲେଖାଥିଲା, ତାକୁ ଫୁଲ ମାଳ ଭିତରେ ଏମିତି ଗୁଞ୍ଜି ଦେଲେ ଯେ, ତାହା ଯେମିତି ମୋଟେ ଖସି ପଡିବ ନାହିଁ। ଦେଖନ୍ତୁ ମାଆର କି ଅପୂର୍ବ ମାୟା। ଯେଉଁ ତାଳପତ୍ରଟି ପଡିଯିବା କଥା ସେ ଗୋଟିକ ଠିକ ସେମିତି ରହିଥିଲା। ମାତ୍ର ଫୁଲମାଳ ଭିତରେ ଗେଞ୍ଜା ଯାଇଥିବା ତଳପତ୍ର ଟି ମାଆଙ୍କ ଅଲୌକିକ ଶକ୍ତିରେ ସିଂହାସନ ତଳକୁ ଖସି ପଡିଥିଲା। ସେଥିରେ ଲେଖା ଥିଲା ମୋର ନିର୍ଦ୍ଧେଶ ବଳି ବନ୍ଦ ହେଉ। ଯେଉଁ ତାଳପତ୍ର ଟି ସିଂହାସନ ତଳେ ପଡ଼ି ଯାଇଥିଲା, ସେଗୋଟିକ ଆଣି ସର୍ବ ସମ୍ମୁଖରେ ଖୋଲି ଦେଖାଗଲା ଯେ, ସେଥିରେ ଲେଖା ଥିଲା ମୋର ନିର୍ଦ୍ଦେଶ “ବଳି ବନ୍ଦ ହେଉ”। ତେଣୁ ସେହିଦିନ ଠାରୁ ଝଙ୍କଡ଼ ସାରଳା ମନ୍ଦିରରୁ ବଳିପ୍ରଥା ର ଉଚ୍ଛେଦ ହେଇଛି। ଜୀବଜଗତର ମାଆ କୌଣସି ଜୀବ ର ବଳି ନୁହେଁ ପଶୁତ୍ଵ ଓ ପାସବିକତା ର ବଳି ତାର ସନ୍ତାନ ମାନଙ୍କ ଠାରୁ ଆଶା କରେ ବୋଲି ଏହା ସତ୍ୟସିଦ୍ଧ ବୋଲି ପ୍ରମାଣିତ ହୋଇ ଯାଇଛି। ତେବେ ଏହି ବଳି ପରିବର୍ତ୍ତେ ସେହିଦିନ ଠାରୁ ଆଜି ପର୍ଯ୍ୟନ୍ତ ମାଆ ସାରଳା ଙ୍କ ପୀଠରେ ଏହି ମହାଷ୍ଟମୀ ସନ୍ଧିପୂଜାରେ ୧୦୮ ପ୍ରକାରର ସୁମିଷ୍ଟ ପ୍ରାସାଦ ଓ ବିଭିନ୍ନ ପ୍ରକାରର ଫଳମୂଳ ସହିତ ବଳି ଉତ୍ସର୍ଗ ପାଇଁ ଏକ ପଣା ହାଣ୍ଡି ପୂଜା କରାଯାଇ ଆସୁଛି। ଆଜିବି ଏହି ସନ୍ଧିପୂଜା ସମୟରେ ବିଦ୍ୟୁତ୍ ସରବରାହ ବିଚ୍ଛିନ୍ନ କରାଯିବା ପରେ, ମନ୍ଦିରର ବେଢ଼ା ର ଚତୁଃପାର୍ଶ୍ୱରେ ବହୁ ତାନ୍ତ୍ରିକ, ସାଧକ, କବି, ଲେଖକ ଓ କଳାକାର ମାନେ ଦ୍ଵୀପ ଜଳାଇ, ମାଆ ଙ୍କ ମନ୍ତ୍ର ଜପକରି ଅସାଧାରଣ ସିଦ୍ଧି ଲାଭ କରି ଆସୁ ଥିବାର ଦେଖିବାକୁ ମିଳୁଛି ।
