ଜଗତସିଂହପୁର : ୩ କୋଟି ଟଙ୍କାରୁ ଊର୍ଦ୍ଧ୍ୱ ସରକାରୀ ପାଣ୍ଠି ହରିଲୁଟ୍ ଓ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତିର୍ତ୍ତୋଲ ବ୍ଲକର ପୂର୍ବତନ ବରିଷ୍ଠ ରାଜସ୍ୱ ସହାୟକ (ଏସ୍ଆର୍ଏ) ତଥା ବର୍ତ୍ତମାନର ନାଉଗାଁ ତହସିଲ ଏସ୍ଆର୍ଏ ଭଞ୍ଜ କିଶୋର ବେହେରାଙ୍କ ବିରୋଧରେ ଭିଜିଲାନ୍ସ ବିଭାଗ ପକ୍ଷରୁ ଜୋରଦାର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କଟକ ଭିଜିଲାନ୍ସ ଥାନା କେସ୍ ନଂ ୩୦/୨୦୨୬ (ଦୁର୍ନୀତି ନିବାରଣ ଆଇନ, ୨୦୧୮) ଅନୁଯାୟୀ, ଶ୍ରୀ ବେହେରାଙ୍କୁ ଗିରଫ କରାଯିବା ପରେ ସୋମବାର ତାଙ୍କ ସହ ଜଡ଼ିତ ଏକକାଳୀନ ୬ଟି ସ୍ଥାନରେ ଚଢ଼ାଉ ଜାରି ରହିଛି।
ଏହି ୬ଟି ସ୍ଥାନରେ ଚାଲିଛି ଚଢ଼ାଉ:
-
ରଘୁନାଥପୁର ଥାନା ଅନ୍ତର୍ଗତ ପାଟେଣିଗାଁସ୍ଥିତ ତାଙ୍କର ଆଲିସାନ ତିନି ମହଲା କୋଠା
-
ପାଟେଣିଗାଁସ୍ଥିତ ଆଉ ଏକ ଦୁଇ ମହଲା କୋଠା
-
ପାଟେଣିଗାଁରେ ଥିବା ପ୍ରାୟ ୮,୪୦୦ ବର୍ଗଫୁଟର ଏକ ବିରାଟ ଟେଣ୍ଟ ହାଉସ୍
-
ନାଉଗାଁ ତହସିଲ କାର୍ଯ୍ୟାଳୟସ୍ଥିତ ଶ୍ରୀ ବେହେରାଙ୍କ ସରକାରୀ ପ୍ରକୋଷ୍ଠ
-
ପୂର୍ବରୁ କାର୍ଯ୍ୟରତ ଥିବା ତିର୍ତ୍ତୋଲ ବିଡିଓଙ୍କ କାର୍ଯ୍ୟାଳୟ
-
ରଘୁନାଥପୁର ଅଧୀନ ସାନକରକୋରା ଗ୍ରାମରେ ଥିବା ତାଙ୍କ ସମ୍ପର୍କୀୟଙ୍କ ବାସଭବନ
ଏପର୍ଯ୍ୟନ୍ତ ଠାବ ହୋଇଥିବା ସମ୍ପତ୍ତି ତାଲିକା:
-
ପାଟେଣିଗାଁରେ ପ୍ରାୟ ୭,୭୫୦ ବର୍ଗଫୁଟ ପରିମିତ ଏକ ବିଶାଳ ତିନି ମହଲା ପ୍ରାସାଦୋପମ କୋଠା
-
ପାଟେଣିଗାଁରେ ଥିବା ଆଉ ଏକ ଦୁଇ ମହଲା ଆବାସିକ ଘର
-
ପ୍ରାୟ ୮,୪୦୦ ବର୍ଗଫୁଟର ଏକ ବଡ଼ ଟେଣ୍ଟ ହାଉସ୍; ଯାହା ପାଇଁ ୨୦୧୯ ମସିହାରେ ସେ ପ୍ରାୟ ୩୦.୪୪ ଲକ୍ଷ ଟଙ୍କାର ସାମଗ୍ରୀ କିଣିଥିଲେ
-
୨୧୦ ଗ୍ରାମର ସୁନା ଗହଣା
-
ଗୋଟିଏ ଚାରିଚକିଆ ଯାନ (ମହିନ୍ଦ୍ରା ପିକ୍-ଅପ୍ ଭ୍ୟାନ୍)
-
ବ୍ୟାଙ୍କ ଓ ଡାକଘର ଜମା ସମେତ ବିଭିନ୍ନ ନିବେଶର ଖୋଳତାଡ଼ ଜାରି
ଉକ୍ତ କୋଠା ଏବଂ ଟେଣ୍ଟ ହାଉସ୍ର ମାପଚୁପ ସହ ପ୍ରକୃତ ମୂଲ୍ୟ ଆକଳନ ଭିଜିଲାନ୍ସର ବୈଷୟିକ ଟିମ୍ (Technical Wing) ଦ୍ୱାରା କରାଯାଉଛି। ବର୍ତ୍ତମାନ ସୁଦ୍ଧା ଚଢ଼ାଉ ପ୍ରକ୍ରିୟା ଜାରି ରହିଛି ଏବଂ ଆଗକୁ ଆହୁରି ଅନେକ ବେଆଇନ ସମ୍ପତ୍ତି ସାମ୍ନାକୁ ଆସିବାର ସମ୍ଭାବନା ରହିଛି।
