ଭୁବନେଶ୍ଵର: ବିମାନ ପାଇଁ ବିପଦ ବାଣ । ଫ୍ଲାଇଟ୍ ଲ୍ୟାଣ୍ଡିଂ ପାଇଁ ଉଦ୍ୟମ ବେଳେ ମଝି ଆକାଶରେ ବାଣ ଫୁଟୁଥିବା ଦେଖି ଘାବରେଇ ଗଲେ ପାଇଲଟ । ଆଉ ଫ୍ଲାଇଟ୍କୁ ସୁରକ୍ଷିତ ଭାବେ ଲ୍ୟାଣ୍ଡିଂ କରିସାରିବା ପରେ ଏୟାରପୋର୍ଟ ଅଥରିଟିଙ୍କୁ ଫେରାଦ୍ ହୋଇଥିଲେ । ଖୋଦ୍ ରାଜଧାନୀ ଭୁବନେଶ୍ବରରେ ଘଟିଛି ଏଭଳି ଘଟଣା । ଗତ ୨୧ ତାରିଖରେ ଦଶହରା ଦିନ ଯେତେବେଳେ ବରମୁଣ୍ଡା ପଡ଼ିଆରେ ରାବଣ ପୋଡ଼ି ଚାଲିଥିଲା, ଯେତେବେଳେ ରାବଣ ଷ୍ଟାଚ୍ୟୁରେ ଲଗାଯାଇଥିବା ବାଣଗୁଡ଼ିକ ଫୁଟୁଥିଲା ଠିକ୍ ସେତିକି ବେଳେ ଜଳୁଥିବା ରାବଣର ମୁଣ୍ଡ ଉପର ଦେଇ ଭୁବନେଶ୍ବର ଏୟାରପୋର୍ଟରେ ଲ୍ୟାଣ୍ଡିଂ ପାଇଁ ଆସୁଥିଲା ଏକ ବିମାନ । ଯାହାର ଭିଜୁଆଲ୍ କ୍ୟାମେରାରେ କଏଦ୍ ହୋଇଛି । ଏହାକୁ ନେଇ ଚିନ୍ତା ବ୍ୟକ୍ତ କରିବା ସହ ଆଗକୁ କିଭଳି ସତର୍କତାମୂଳକ ପଦକ୍ଷେପ ନିଆଯାଇପାରିବ ସେଥି ପାଇଁ ପଦକ୍ଷେପ ନେଉଛନ୍ତି ଏୟାରପୋର୍ଟ ଅଥରିଟି ।
ଭୁବନେଶ୍ବର ବରମୁଣ୍ଡା ପଡ଼ିଆରେ ଚାଲିଥିଲା ରାବଣ ପୋଡ଼ି । ଚାଲିଥିଲା ଜୋରଦାର ଆତସବାଜି । ଆକାଶର ଛାତି ଚିରି ଉପରକୁ ଉଠୁଥିଲା ବାଣ ନିଆଁର ଫୁଆରା । ଠିକ୍ ଏତିକି ବେଳେ ଭୁବନେଶ୍ବର ଏୟାରପୋର୍ଟରେ ଲ୍ୟାଣ୍ଡିଂ ପାଇଁ ତଳକୁ ଖସୁଥିଲା ବିମାନ । କେତେ ଭୟଙ୍କର ଥିଲା ଏହି ଦୃଶ୍ୟ । ଗୋଟେପଟେ ଚାଲିଥିଲା ରାବଣ ପୋଡ଼ି । ରାବଣ ଷ୍ଟାଚ୍ୟୁରେ ଲାଗିଥିବା ବାଣ ଆକାଶ ଆଡ଼କୁ ଛୁଟିଥିଲା । ଆଉ ତଳେ ଲାଗିଥିବା ସର୍ଟସ୍ ଗୁଡ଼ିକରୁ ଆକାଶମୁହାଁ ହେଉଥିଲା ବାଣ ନିଆଁର ଫୁଆରା । ଠିକ୍ ଏତିକି ବେଳେ ଏୟାରରେ ସେହି ରାସ୍ତା ଦେଇ ତଳକୁ ଖସୁଥିଲା ବିମାନ । ବିମାନରେ ଥିଲେ ଶତାଧିକ ଯାତ୍ରୀ ।
ଲ୍ୟାଣ୍ଡିଂ ବେଳେ ଆଖି ସାମ୍ନାରେ ବାଣ ଫୁଟୁଥିବା ଦେଖି ପ୍ରଥମେ ଘାବରେଇ ଯାଇଥିଲେ ବିମାନର ପାଇଲଟ । କିଛି ସମୟ ପାଇଁ ତାଙ୍କର ମୁଣ୍ଡ କାମ କରିନଥିଲା । ତାଙ୍କୁ ଲାଗୁଥିଲା ଯେମିତି ବାଣର ନିଆଁ ଗୁଡ଼ିକ ତାଙ୍କ ବିମାନ ଆଡ଼କୁ ମାଡ଼ି ଆସୁଛି । ଏଭଳି ସ୍ଥିତିରେ ପାଇଲଟଙ୍କ ଅବସ୍ଥା କ’ଣ ହେଉଥିବା ଏହି ଦୃଶ୍ୟ ଦେଖି ଟିକେ ଅନୁମାନ କରନ୍ତୁ । ଗୋଟେ ପଟେ ବିମାନରେ ଥିବା ଶତାଧିକ ଯାତ୍ରୀଙ୍କ ଜୀବନର ଚିନ୍ତା । ଆଉ ଗୋଟେ ପଟେ ବିମାନର ସୁରକ୍ଷିତ ଲ୍ୟାଣ୍ଡିଂ ଟେନସନ୍ । ଦଶହରାରେ ଦେବୀ ଦୁର୍ଗାଙ୍କ କୃପାରୁ ପାଇଲଟ ଜଣକ ନିଜକୁ ନିୟନ୍ତ୍ରଣରେ ରଖି ଭୁବନେଶ୍ବର ଏୟାରପୋର୍ଟରେ ବିମାନକୁ ସୁରକ୍ଷିତ ଲ୍ୟାଣ୍ଡିଂ କରାଇଥିଲେ ।
ହେଲେ ଏହି ଘଟଣାକୁ ନେଇ ସେ ଏତେ ଚିନ୍ତିତ ହୋଇପଡ଼ିଥିଲେ ଯେ, ସେ ତୁରନ୍ତ ବିମାନରୁ ଏୟାରପୋର୍ଟ ଅଥରିଟିଙ୍କୁ ଜଣାଇଥିଲେ । ଏଭଳି ସ୍ଥିତିରେ ଯଦି କୌଣସି ବଡ଼ ଅଘଟଣ ଘଟିଥାନ୍ତା ତାହେଲେ ଏଥି ପାଇଁ କିଏ ଦାୟୀ ହୋଇଥାନ୍ତେ ? ବିମାନ ଯିବା ଆସିବା କରୁଥିବା ଜାଗାରେ ଏଭଳି ବାଣ ଫୁଟାଇବାକୁ କିଏ ଅନୁମତି ଦେଇଥିଲେ ? ବିମାନବନ୍ଦର କର୍ତ୍ତୃପକ୍ଷ ଏ ବାବଦରେ ପୂର୍ବରୁ ଅବଗତ ଥିଲେ କି? ତେବେ ଏନେଇ ବିମାନବନ୍ଦର କର୍ତ୍ତୃପକ୍ଷଙ୍କ କହିବା କଥା ସ୍ଥାନୀୟ ପ୍ରଶାସନକୁ ଘଟଣା ବାବଦରେ ଅବଗତ କରାଯାଇଛି । ବିମାନ ଲ୍ୟାଣ୍ଡିଂ କିମ୍ବା ଟେକ୍ ଅଫ୍ ବେଳେ ଆକାଶକୁ ରକେଟ୍ ବାଣ ଛାଡ଼ିବା ବା ଲେଜର ଲାଇଟ୍ ପକାଇବା ବଡ଼ ଦୁର୍ଘଟଣାକୁ ଆମନ୍ତ୍ରଣ କରିପାରେ ବୋଲି କହିଛନ୍ତି ବିମାନବନ୍ଦର କର୍ତ୍ତୃପକ୍ଷ।
ଭୁବନେଶ୍ବର ବିମାନ ବନ୍ଦରକୁ ଫ୍ଲାଇଟ୍ ରୁଟର ଏହି ମ୍ୟାପ୍ ଉପରେ ମଧ୍ୟ ନଜର ପକାନ୍ତୁ । ବିମାନବନ୍ଦରରୁ କେତେ ନିକଟରେ ରହିଛି ବରମୁଣ୍ଡା ପଡ଼ିଆ । ରନୱେ ର ଆପ୍ରୋଚ ରୋଡ, ଏହି ଦିଗରେ ରହିଛି । ତେଣୁ ବିମାନର ଟେକ ଅଫ ଓ ଲ୍ୟାଣ୍ଡିଂ ପାଇଁ ଏହି ରୁଟ ରହିଛି ବୋଲି କହିଛନ୍ତି ବିମାନବନ୍ଦର କର୍ତ୍ତୃପକ୍ଷ । ବାଣ କିମ୍ବା ଲେଜର ଲାଇଟ ଦ୍ବାରା ପାଇଲଟ ଫ୍ଲାଇଟ୍ର ପ୍ରକୃତ ରୁଟ୍ ଦେଖିବାରେ ସମସ୍ୟା ହୋଇଥାଏ । ଏମିତିକି ବିମାନ ପାଖାପାଖିରେ ବାଣ ଫୁଟୁଥିବା ଦେଖି ପାଇଲଟ ବିଚଳିତ ମଧ୍ୟ ହୋଇପାରନ୍ତି । ବିଚଳିତ ଅବସ୍ଥାରେ କୌଣସି ପ୍ରକାର ଅସ୍ବାଭାବିକ ପଦକ୍ଷେପ ମଧ୍ୟ ନେଇପାରନ୍ତି । ଏମିତିରେ ବିମାନରେ ଥିବା ଯାତ୍ରୀଙ୍କ ଜୀବନ ବିପଦରେ ପଡ଼ିପାରେ । ଏଥିପାଇଁ ବିମାନବନ୍ଦର ନିକଟରେ ବାଣଫୁଟାଇବା କିମ୍ବା ଲେଜର ଲାଇଟ୍ ବ୍ୟବହାର ପାଇଁ ବାରଣ ରହିଛି । ହେଲେ ଏହାକୁ କେହି ମାନୁନଥିବାରୁ ଚିନ୍ତା ବ୍ୟକ୍ତ କରିଛନ୍ତି ବିମାନବନ୍ଦର କର୍ତ୍ତୃପକ୍ଷ ।
ସେହିଭଳି ବିମାନବନ୍ଦର ନିକଟରେ ସୁଉଚ୍ଚ ଅଟାଳିକା ନିର୍ମାଣ ପାଇଁ ମଧ୍ୟ ବାରଣ ରହିଛି । ସେପଟେ ବରମୁଣ୍ଡା ପଡ଼ିଆରେ ରାବଣ ପୋଡ଼ି ବେଳେ ବାଣଫୁଟାଇବା ପାଇଁ କମିଶନରେଟ ପୋଲିସ ଅନୁମତି ଦେଇଥାଏ । BMC କେବଳ ଅନୁସଙ୍ଗିକ ସହଯୋଗ କରେ ବୋଲି ସଫେଇ ଦେଇଛନ୍ତି ଭୁବନେଶ୍ବର ମେୟର । ଏଭଳି ଘଟଣା ଭବିଶ୍ୟତରେ ଯେମିତି ଆଉ ନହେବ ସେଥି ପ୍ରତି ଆଗକୁ ଧ୍ୟାନ ଦିଆଯିବ ବୋଲି କହିଛନ୍ତି ମେୟର ।
ପ୍ରତିବର୍ଷ ଭୁବନେଶ୍ବର ବରମୁଣ୍ଡା ପଡ଼ିଆରେ ରାବଣ ପୋଡ଼ି ଓ ଆତସବାଜି କାର୍ଯ୍ୟକ୍ରମ ହୋଇ ଆସୁଛି । କିନ୍ତୁ ପୂର୍ବରୁ ଏଥି ପ୍ରତି କେହି ଧ୍ୟାନ ଦେଇନଥିଲେ । କାରଣ ପୂର୍ବରୁ ଭୁବନେଶ୍ବର ଏୟାରପୋର୍ଟକୁ ଏତେ ବିମାନ ଚଳାଚଳ ନଥିଲା । ଏବେ କିନ୍ତୁ ବିମାନ ଚଳାଚଳ ସଂଖ୍ୟା ଢ଼େର ବୃଦ୍ଧି ପାଇଛି । ପ୍ରତି ୧୦ରୁ ୧୫ ମିନିଟ୍ ଭିତରେ ଗୋଟିଏ ପରେ ଗୋଟିଏ ବିମାନ ଭୁବନେଶ୍ବର ଏୟାରପୋର୍ଟରେ ଟେକ୍ଅଫ୍ କିମ୍ବା ଲ୍ୟାଣ୍ଡିଂ କରୁଛନ୍ତି । ତେଣୁ ବିମାନ ବନ୍ଦର ଆଖପାଖରେ ଏଭଳି ଘଟଣାକୁ କିଭଳି ରୋକାଯାଇପାରିବ ସେନେଇ ଆଗକୁ ପ୍ରଶାସନ ଧ୍ୟାନ ଦେବା ଜରୁରୀ ହୋଇପଡ଼ିଛି ।
