ଭୁବନେଶ୍ୱର: ରାଜ୍ୟର ସାମଗ୍ରିକ କୃଷି ବ୍ୟବସ୍ଥାକୁ ଅଧିକ ସ୍ଥାୟୀ ଓ ଜଳବାୟୁ ସହନଶୀଳ କରିବା ସହ ପୁଷ୍ଟି ସୁରକ୍ଷା, ମହିଳା ସଶକ୍ତୀକରଣ, ଜୈବବିବିଧତା ସଂରକ୍ଷଣ ଏବଂ ଗ୍ରାମୀଣ ତଥା ଆଦିବାସୀ ସମ୍ପ୍ରଦାୟର ଜୀବିକାକୁ ସୁଦୃଢ଼ କରିବା ଲକ୍ଷ୍ୟରେ ଓଡ଼ିଶା ସରକାର ଏକ ଯୁଗାନ୍ତକାରୀ ତଥା ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛନ୍ତି। ଏହି ମହତ୍ ଉଦ୍ଦେଶ୍ୟରେ ମଙ୍ଗଳବାର ଦିନ ଲୋକସେବା ଭବନଠାରେ ଓଡ଼ିଶା ସରକାର ଏବଂ ଏମ୍.ଏସ୍. ସ୍ୱାମୀନାଥନ୍ ରିସର୍ଚ୍ଚ ଫାଉଣ୍ଡେସନ୍ (ଏମ୍ଏସ୍ଏସ୍ଆର୍ଏଫ୍) ମଧ୍ୟରେ ଏକ ଐତିହାସିକ ବୁଝାମଣାପତ୍ର (ଏମ୍ଓୟୁ) ସ୍ୱାକ୍ଷରିତ ହୋଇଛି।
ଓଡ଼ିଶାର ମୁଖ୍ୟ ଶାସନ ସଚିବ ଅନୁ ଗର୍ଗ, ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଦେଓରଞ୍ଜନ କୁମାର ସିଂହ ଏବଂ ବିଭିନ୍ନ ବିଭାଗର ପ୍ରମୁଖ ଶାସନ ସଚିବ, ସଚିବ ଓ ବରିଷ୍ଠ ପଦାଧିକାରୀଙ୍କ ଉପସ୍ଥିତିରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଥିଲା। ଏହି କାର୍ଯ୍ୟକ୍ରମରେ ଏମ୍ଏସ୍ଏସ୍ଆର୍ଏଫ୍ର ଅଧ୍ୟକ୍ଷା ଡକ୍ଟର ସୌମ୍ୟା ସ୍ୱାମୀନାଥନ୍ ଓ ଅନ୍ୟାନ୍ୟ ବରିଷ୍ଠ ପ୍ରତିନିଧିମାନେ ପ୍ରତ୍ୟକ୍ଷ ଭାବେ ଯୋଗ ଦେଇଥିଲେ। ରାଜ୍ୟ ସରକାରଙ୍କ ପକ୍ଷରୁ ଯୋଜନା ଓ ସଂଯୋଜନ ବିଭାଗର ଅତିରିକ୍ତ ଶାସନ ସଚିବ ଶୁଭାଶ୍ରୀ ନନ୍ଦ ଏବଂ ଫାଉଣ୍ଡେସନ୍ ପକ୍ଷରୁ ଅଧ୍ୟକ୍ଷା ଡକ୍ଟର ସୌମ୍ୟା ସ୍ୱାମୀନାଥନ୍ ଏହି ବୁଝାମଣାପତ୍ରରେ ବିଧିବଦ୍ଧ ଭାବେ ସ୍ୱାକ୍ଷର କରିଥିଲେ।
ଏହି ସହଭାଗିତା ମାଧ୍ୟମରେ କୃଷି, ପୁଷ୍ଟି, ସ୍ୱାସ୍ଥ୍ୟ, ପରିବେଶ ଓ ସ୍ଥାୟୀ ଜୀବିକା କ୍ଷେତ୍ରରେ ଉଚ୍ଚକୋଟୀର ବୈଜ୍ଞାନିକ ଗବେଷଣା, ସ୍ଥାନୀୟ ପାରମ୍ପରିକ ଜ୍ଞାନକୌଶଳ ଏବଂ ସରକାରୀ ନୀତି ମଧ୍ୟରେ ଏକ ସଫଳ ସମନ୍ୱୟ ରକ୍ଷା କରାଯିବ। ଏମ୍ଏସ୍ଏସ୍ଆର୍ଏଫ୍ ରାଜ୍ୟ ସରକାରଙ୍କ ଏକ ପ୍ରମୁଖ ବୈଷୟିକ ଜ୍ଞାନ ସହଯୋଗୀ (ଟେକ୍ନିକାଲ୍ ନଲେଜ୍ ପାର୍ଟନର) ଭାବେ କାର୍ଯ୍ୟ କରି ବିଭିନ୍ନ ବିଭାଗକୁ ନୀତି ପ୍ରଣୟନ, ବିକାଶମୂଳକ କାର୍ଯ୍ୟକ୍ରମର ରୂପରେଖ ପ୍ରସ୍ତୁତି, ପ୍ରାୟୋଗିକ ଗବେଷଣା, ଦକ୍ଷତା ବିକାଶ, ନବସୃଜନ ଓ କାର୍ଯ୍ୟକ୍ରମର ବ୍ୟାପକ ବିସ୍ତାର କ୍ଷେତ୍ରରେ ଆବଶ୍ୟକୀୟ ବୈଷୟିକ ସହଯୋଗ ଯୋଗାଇଦେବ। ଏହି ସହଯୋଗ କ୍ରମରେ ବିଶେଷ ଭାବେ ଜଳବାୟୁ ସହନଶୀଳ କୃଷି, କୃଷି-ପରିବେଶଭିତ୍ତିକ ପ୍ରାକୃତିକ ଚାଷ ପଦ୍ଧତି, ପୁଷ୍ଟିକର ମିଲେଟ୍ (ମାଣ୍ଡିଆ ଜାତୀୟ ଶସ୍ୟ) ଓ ଅନ୍ୟାନ୍ୟ ବିକଳ୍ପ ଲାଭଜନକ ଫସଲର ପ୍ରୋତ୍ସାହନ, ଦେଶୀୟ ତଥା ପାରମ୍ପରିକ ବିହନ ଓ କୃଷି ଜୈବବିବିଧତାର ସଂରକ୍ଷଣ ସହିତ ସ୍ଥାୟୀ ଖାଦ୍ୟ ବ୍ୟବସ୍ଥାର ବିକାଶକୁ ସର୍ବାଧିକ ପ୍ରାଧାନ୍ୟ ଦିଆଯିବ। ଏଥିସହ କୃଷି କ୍ଷେତ୍ରରେ ମହିଳା କୃଷକମାନଙ୍କ ସକ୍ରିୟ ଅଂଶଗ୍ରହଣ, ଆର୍ଥିକ ସଶକ୍ତୀକରଣ, କୃଷି ଉଦ୍ୟୋଗ ବିକାଶ ଓ ଉନ୍ନତ ବଜାର ସଂଯୋଗ ବ୍ୟବସ୍ଥାକୁ ଆହୁରି ସୁଦୃଢ଼ କରାଯିବ। ‘ସୁଭଦ୍ରା ଫାଷ୍ଟ’ ଆଭିମୁଖ୍ୟ ଅନୁଯାୟୀ ମହିଳା ଓ ସାମାଜିକ ତଥା ଆର୍ଥିକ ଦୃଷ୍ଟିରୁ ପଛୁଆ ବର୍ଗର ପରିବାରଗୁଡ଼ିକୁ ସ୍ଥାୟୀ ଜୀବିକା ସୁଯୋଗ ସହିତ ସିଧାସଳଖ ଯୋଡ଼ିବାର ଏକ ବୃହତ୍ ଲକ୍ଷ୍ୟ ରଖାଯାଇଛି।
ରାଜ୍ୟର କୃଷି ବିଶ୍ୱବିଦ୍ୟାଳୟଗୁଡ଼ିକରେ ‘ବାୟୋ-ହାପିନେସ୍ କେନ୍ଦ୍ର’ ପ୍ରତିଷ୍ଠା କରାଯିବ, ଯାହା ମାଧ୍ୟମରେ ଜୈବବିବିଧତା ପରିଚାଳନା, ପରିବେଶ ଅନୁକୂଳ କୃଷି ଏବଂ ପ୍ରାକୃତିକ ସମ୍ପଦର ଦୀର୍ଘସ୍ଥାୟୀ ସୁରକ୍ଷାକୁ ଉତ୍ସାହିତ କରାଯିବ। ବିଶେଷ କରି ଆଦିବାସୀ ଅଧ୍ୟୁଷିତ ଓ ଦୁର୍ଗମ ଅଞ୍ଚଳରେ ପୁଷ୍ଟି ତଥା ସ୍ୱାସ୍ଥ୍ୟ ସୁରକ୍ଷା, ସ୍ଥାନୀୟ ଖାଦ୍ୟ ବ୍ୟବସ୍ଥାର ଉନ୍ନତିକରଣ ଏବଂ ନୂତନ ଜୀବିକା ସୃଷ୍ଟି ଉପରେ ବିଶେଷ ଗୁରୁତ୍ୱାରୋପ କରାଯିବ। ଅନ୍ୟପକ୍ଷରେ, ଉପକୂଳବର୍ତ୍ତୀ ଅଞ୍ଚଳର କ୍ଷୁଦ୍ର ଓ ନାମମାତ୍ର ମତ୍ସ୍ୟଜୀବୀମାନଙ୍କ ନିରାପଦ ଜୀବିକା ଓ ସୁରକ୍ଷାକୁ ସୁଦୃଢ଼ କରିବା ପାଇଁ ‘ଫିସର ଫ୍ରେଣ୍ଡ’ ମୋବାଇଲ୍ ଆପ୍ଲିକେସନର ଉନ୍ନତୀକରଣ, ତୃଣମୂଳ ସ୍ତରରେ ଡିଜିଟାଲ୍ ସେବାର ପ୍ରସାର, ମତ୍ସ୍ୟଜାତ ଦ୍ରବ୍ୟର ବୈଜ୍ଞାନିକ ସଂରକ୍ଷଣ ଏବଂ ମୂଲ୍ୟଯୁକ୍ତ ଉତ୍ପାଦ ପ୍ରସ୍ତୁତି ସହ ମହିଳା ମତ୍ସ୍ୟଜୀବୀମାନଙ୍କ ଉଦ୍ୟୋଗ ବିକାଶ ଲାଗି ସମସ୍ତ ପ୍ରକାର ଆନୁଷଙ୍ଗିକ ସହାୟତା ଯୋଗାଇ ଦିଆଯିବ। ଏଥିସହିତ ପ୍ରାକୃତିକ ଜଳାଶୟ, ଆର୍ଦ୍ରଭୂମି, ହେନ୍ତାଳବନ (ମାଙ୍ଗ୍ରୋଭ୍) ଓ ସମୁଦ୍ର ଉପକୂଳବର୍ତ୍ତୀ ସମ୍ବେଦନଶୀଳ ପରିବେଶର ସଂରକ୍ଷଣ ତଥା ପୁନରୁଦ୍ଧାର ଦିଗରେ ଉଭୟ ପକ୍ଷ ମିଳିତ ଭାବେ କାର୍ଯ୍ୟ କରିବେ।
ରାଜ୍ୟର ଦାଦନ ପ୍ରବଣ ଅଞ୍ଚଳଗୁଡ଼ିକରେ ସ୍ଥାନୀୟ ସ୍ତରରେ ନିରନ୍ତର ଜୀବିକା ସୃଷ୍ଟି, କୃଷି ଓ ଆନୁଷଙ୍ଗିକ କାର୍ଯ୍ୟକଳାପର ପ୍ରସାର, ଯୁବପିଢ଼ିଙ୍କ ବୈଷୟିକ ଦକ୍ଷତା ବିକାଶ, ମହିଳା ସ୍ୱୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ଗୁଡ଼ିକର କ୍ଷୁଦ୍ର ଉଦ୍ୟୋଗକୁ ସୁଦୃଢ଼ କରିବା ତଥା ସେମାନଙ୍କ ଉତ୍ପାଦିତ ସାମଗ୍ରୀ ପାଇଁ ସୁଗମ ବଜାର ସଂଯୋଗ ଉପରେ ସର୍ବାଧିକ ଗୁରୁତ୍ୱ ଦିଆଯିବ। ଏହାଦ୍ୱାରା ଗ୍ରାମାଞ୍ଚଳରେ ନିଯୁକ୍ତି ତଥା ରୋଜଗାରର ନୂତନ ସୁଯୋଗ ବୃଦ୍ଧି ପାଇବା ସହିତ ଦାଦନଜନିତ ସାମାଜିକ ଅସୁରକ୍ଷା ଓ ସମସ୍ୟା ହ୍ରାସ କରିବାରେ ବଡ଼ ଧରଣର ସହାୟତା ମିଳିପାରିବ। ଏହି ବୁଝାମଣାପତ୍ରର ସଠିକ୍ କାର୍ଯ୍ୟକାରିତା, ତଦାରଖ ଓ ଅଗ୍ରଗତିର ନିୟମିତ ସମୀକ୍ଷା ନିମନ୍ତେ ଉନ୍ନୟନ କମିଶନରଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ଷ୍ଟିୟରିଂ କମିଟି ଗଠନ କରାଯିବ। ଏଥିରେ ସମ୍ପୃକ୍ତ ସମସ୍ତ ବିଭାଗର ପ୍ରମୁଖ ସଚିବ ଏବଂ ଏମ୍ଏସ୍ଏସ୍ଆର୍ଏଫ୍ର ବରିଷ୍ଠ ପ୍ରତିନିଧିମାନେ ସଦସ୍ୟ ଭାବେ ରହିବେ। ଏହି କମିଟି ନିର୍ଦ୍ଦିଷ୍ଟ ବ୍ୟବଧାନରେ ନିୟମିତ ବୈଠକ କରି ବିଭିନ୍ନ କାର୍ଯ୍ୟକ୍ରମର ବାସ୍ତବ ଅଗ୍ରଗତି, ଲକ୍ଷ୍ୟ ହାସଲ, ଫଳାଫଳ ଓ କ୍ଷେତ୍ରସ୍ତରୀୟ କାର୍ଯ୍ୟକାରିତାର ପୁଙ୍ଖାନୁପୁଙ୍ଖ ସମୀକ୍ଷା କରିବ।
ଏହି ଅବସରରେ ଏମ୍ଏସ୍ଏସ୍ଆର୍ଏଫ୍ର ଅଧ୍ୟକ୍ଷା ଡକ୍ଟର ସୌମ୍ୟା ସ୍ୱାମୀନାଥନ୍ କହିଥିଲେ ଯେ, ଏହି ସହଭାଗିତା ଓଡ଼ିଶା ସହିତ ଫାଉଣ୍ଡେସନ୍ର ପୂର୍ବ ସମ୍ପର୍କକୁ ଆହୁରି ସୁଦୃଢ଼ କରିବା ସହ ପ୍ରାକୃତିକ ସମ୍ପଦର ସ୍ଥାୟୀ ପରିଚାଳନା ଦିଗରେ ନୂତନ ମିଳିତ କାର୍ଯ୍ୟର ସୁଯୋଗ ସୃଷ୍ଟି କରିବ। ବିଭିନ୍ନ ଜଟିଳ ବିକାଶମୂଳକ ସମସ୍ୟାର ସମାଧାନରେ ଉନ୍ନତ ନବସୃଜନ, ସବୁଜ ପ୍ରଯୁକ୍ତିବିଦ୍ୟାର ପ୍ରୟୋଗ, ଲିଙ୍ଗଗତ ସମାନତା, ମହିଳା ସଶକ୍ତୀକରଣ, ମିଲେଟ୍ ଚାଷର ବ୍ୟାପକ ପ୍ରଚାରପ୍ରସାର ଏବଂ କୃଷିଜାତ ଦ୍ରବ୍ୟର ପ୍ରକ୍ରିୟାକରଣ ପ୍ରଯୁକ୍ତିର ବିକାଶ ଉପରେ ଏହି ଦ୍ୱିପାକ୍ଷିକ ସହଯୋଗରେ ସର୍ବାଧିକ ଗୁରୁତ୍ୱ ଦିଆଯିବ।
ଅନ୍ୟପକ୍ଷରେ, ଓଡ଼ିଶାର ମୁଖ୍ୟ ଶାସନ ସଚିବ ଅନୁ ଗର୍ଗ ପ୍ରକାଶ କରିଥିଲେ ଯେ, ଏମ୍ଏସ୍ଏସ୍ଆର୍ଏଫ୍ ଭଳି ଏକ ଆନ୍ତର୍ଜାତିକ ଖ୍ୟାତିସମ୍ପନ୍ନ ସୁନାମଧନ୍ୟ ଗବେଷଣା ଅନୁଷ୍ଠାନ ସହ ଏହି ବୁଝାମଣାପତ୍ର ସ୍ୱାକ୍ଷରିତ ହେବା ସମଗ୍ର ରାଜ୍ୟ ପାଇଁ ଅତ୍ୟନ୍ତ ଗର୍ବ ଓ ଗୌରବର ବିଷୟ। ଏହା ରାଜ୍ୟରେ ବିଜ୍ଞାନଭିତ୍ତିକ, ସମାବେଶୀ ଓ ସ୍ଥାୟୀ ବିକାଶ ଦିଗରେ ଏକ ଯୁଗାନ୍ତକାରୀ ତଥା ବଳିଷ୍ଠ ପଦକ୍ଷେପ। ଏମ୍ଏସ୍ଏସ୍ଆର୍ଏଫ୍ ବୈଷୟିକ ଜ୍ଞାନ ସହଯୋଗୀ ଭାବେ କୃଷି, ପୁଷ୍ଟି, ଜୈବବିବିଧତା ସଂରକ୍ଷଣ ଓ ଜୀବନଧାରଣ ମାନର ଉନ୍ନତି କ୍ଷେତ୍ରରେ ପ୍ରମାଣଭିତ୍ତିକ ଦୃଢ଼ ପଦକ୍ଷେପ ଗ୍ରହଣରେ ସହାୟକ ହେବ। ‘ସୁଭଦ୍ରା ଫାଷ୍ଟ’ ଆଭିମୁଖ୍ୟ ମାଧ୍ୟମରେ ମହିଳାମାନଙ୍କୁ କୃଷି ଓ ଗ୍ରାମୀଣ ଜୀବିକାର ରୂପାନ୍ତରଣର ମୁଖ୍ୟ କେନ୍ଦ୍ରବିନ୍ଦୁରେ ରଖିବା ସହିତ ଜଳବାୟୁ ସହନଶୀଳତା ଓ ସ୍ଥାୟୀ ଆୟ ସୃଷ୍ଟିକୁ ସର୍ବାଗ୍ରେ ପ୍ରାଧାନ୍ୟ ଦିଆଯିବ। ଏହି ପାଞ୍ଚବର୍ଷୀୟ ସହଭାଗିତା ସରକାରଙ୍କ ବିଭିନ୍ନ ବିଭାଗ ମଧ୍ୟରେ ଆଭ୍ୟନ୍ତରୀଣ ସମନ୍ୱୟକୁ ସୁଦୃଢ଼ କରି ରାଜ୍ୟର ସାମଗ୍ରିକ ବିକାଶ ଏବଂ ସାଧାରଣ ଜନତାଙ୍କ ସର୍ବାଙ୍ଗୀନ କଲ୍ୟାଣ ପାଇଁ ବ୍ୟାପକ ସ୍ତରରେ କାର୍ଯ୍ୟକାରୀ ହୋଇପାରୁଥିବା ଏକ ଦୀର୍ଘସ୍ଥାୟୀ ସମାଧାନର ମାର୍ଗ ପ୍ରଶସ୍ତ କରିବ ବୋଲି ସେ ଦୃଢ଼ ଆଶା ପ୍ରକାଶ କରିଛନ୍ତି।
