କଟକ: “ସତ୍ୟର ଶେଷରେ ଜୟ ହୋଇଛି,” ଏହି ମନ୍ତବ୍ୟ ସହ ନିଖିଳ ଓଡ଼ିଶା ମିନି ଟ୍ରକ ମାଲିକ ମହାସଂଘ ନିଜର ସଫଳତାକୁ ବଖାଣିଛି। ଅନ୍ୟ ରାଜ୍ୟରେ ପଞ୍ଜୀକୃତ ଗାଡ଼ିକୁ ଓଡ଼ିଶା ଭିତରେ ବ୍ୟବସାୟିକ ପରିବହନ ପାଇଁ ବ୍ୟବହାର କରିବା ଏକ ଟ୍ରାନ୍ସପୋର୍ଟ କମ୍ପାନୀକୁ ମହଙ୍ଗା ପଡ଼ିଛି। ମହାସଂଘର ତ୍ୱରିତ ପଦକ୍ଷେପ ଯୋଗୁଁ କଟକ ଆରଟିଓ (ଆଞ୍ଚଳିକ ପରିବହନ ଅଧିକାରୀ) ଏହି ବେଆଇନ କାର୍ଯ୍ୟକୁ ଧରିବା ସହ ସମ୍ପୃକ୍ତ ଗାଡ଼ିଗୁଡ଼ିକ ଉପରେ ମୋଟା ଅଙ୍କର ଜରିମାନା ଲଗାଇଛନ୍ତି।
ଘଟଣାଟି ଘଟିଥିଲା ଗତକାଲି ବିଳମ୍ବିତ ରାତିରେ। ମହାସଂଘକୁ ଖବର ମିଳିଥିଲା ଯେ, କଟକରେ କିଛି ବାହାର ରାଜ୍ୟର ଟ୍ରକ୍ ଓଡ଼ିଶା ଭିତରେ ପରିବହନ ପାଇଁ ମାଲ୍ ଲୋଡ୍ କରୁଛନ୍ତି, ଯାହାକି ପରିବହନ ନିୟମର ସମ୍ପୂର୍ଣ୍ଣ ଉଲ୍ଲଂଘନ। ଖବର ପାଇବା ମାତ୍ରେ ମହାସଂଘର ସଭାପତିଙ୍କ ନେତୃତ୍ୱରେ ସୁଶାନ୍ତ ରଣା, ପ୍ରଶାନ୍ତ ପଟ୍ଟନାୟକ, ଅଜୟ ପଣ୍ଡା, ଗଗନ ବାବୁ, ବିଜୁ ବାବુ, ଆର୍ତ୍ତ ବାବୁ, ସନ୍ତୋଷ ପ୍ରଧାନ, କାଳିଆ ଜେନା ଏବଂ ଦେବାଶିଷ ମିଶ୍ରଙ୍କୁ ନେଇ ଗଠିତ ଏକ ପ୍ରତିନିଧି ଦଳ ଘଟଣାସ୍ଥଳରେ ପହଞ୍ଚିଥିଲେ।
ସେଠାରେ ସେମାନେ ଦେଖିବାକୁ ପାଇଥିଲେ ଯେ, ୧୦ରୁ ଅଧିକ ଗାଡ଼ି ମାଲ୍ ଲୋଡ୍ କରିସାରି ଗନ୍ତବ୍ୟସ୍ଥଳକୁ ଯିବା ପାଇଁ ପ୍ରସ୍ତୁତ ହେଉଥିଲେ। ମହାସଂଘର ସଭାପତି ତୁରନ୍ତ ଏ ବିଷୟରେ କଟକ ଆରଟିଓଙ୍କୁ ଅବଗତ କରାଇଥିଲେ। ବିଳମ୍ବିତ ରାତି ସତ୍ତ୍ୱେ ଆରଟିଓ ତତ୍ପରତା ଦେଖାଇ ଘଟଣାସ୍ଥଳରେ ପହଞ୍ଚିଥିଲେ ଏବଂ ନିୟମ ଉଲ୍ଲଂଘନ କରିଥିବା ପ୍ରତିଟି ଗାଡ଼ି ଉପରେ ୩୫,୦୦୦ ଟଙ୍କା ଲେଖାଏଁ ଜରିମାନା ଆଦାୟ କରିଥିଲେ।
ଡ୍ରାଇଭରଙ୍କ ଅଭିଯୋଗ:
ତେବେ ଘଟଣାଟି ଏକ ନୂଆ ମୋଡ଼ ନେଇଥିଲା ଯେତେବେଳେ ଗାଡ଼ିର ଡ୍ରାଇଭରମାନେ ଅଭିଯୋଗ କରିଥିଲେ ଯେ, ଟ୍ରାନ୍ସପୋର୍ଟ କମ୍ପାନୀ ସେମାନଙ୍କୁ ପ୍ରତାରିତ କରିଛି। ସେମାନଙ୍କ କହିବା ଅନୁଯାୟୀ, “ଆମକୁ ଆନ୍ଧ୍ରପ୍ରଦେଶର ପଲାସାକୁ ମାଲ୍ ଯିବ ବୋଲି କୁହାଯାଇଥିଲା, କିନ୍ତୁ ଗାଡ଼ିରେ ଓଡ଼ିଶାର ପାରଳାଖେମୁଣ୍ଡି ପାଇଁ ମାଲ୍ ଲୋଡ୍ କରାଯାଇଛି।” ଡ୍ରାଇଭରମାନେ ଜିଦ୍ ଧରିଥିଲେ ଯେ, ଯେପର୍ଯ୍ୟନ୍ତ ଟ୍ରାନ୍ସପୋର୍ଟ କମ୍ପାନୀ ଜରିମାନା ଅର୍ଥ ପ୍ରଦାନ ନ କରିଛି, ସେପର୍ଯ୍ୟନ୍ତ ସେମାନେ ଗାଡ଼ିରୁ ମାଲ୍ ଅନଲୋଡ୍ କରିବେ ନାହିଁ।
ଏହି ସଫଳ ପ୍ରୟାସ ପାଇଁ ମହାସଂଘ ପକ୍ଷରୁ ସମସ୍ତ ସଦସ୍ୟ ଏବଂ ବିଶେଷ କରି ତ୍ୱରିତ କାର୍ଯ୍ୟାନୁଷ୍ଠାନ ପାଇଁ କଟକ ଆରଟିଓଙ୍କୁ ଧନ୍ୟବାଦ ଜ୍ଞାପନ କରାଯାଇଛି।
