ଦେଶରେ କୃତ୍ରିମ ବୁଦ୍ଧିମତା ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ର ଅପବ୍ୟବହାର ରୋକିବା ପାଇଁ କେନ୍ଦ୍ର ସରକାର ଏକ କଠୋର ପଦକ୍ଷେପ ଗ୍ରହଣ କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମଗୁଡିକ ପାଇଁ ସରକାର ନୂଆ ନିୟମ ଜାରି କରିଛନ୍ତି, ଯାହାଦ୍ୱାରା ଏଆଇ ଦ୍ୱାରା ପ୍ରସ୍ତୁତ ବିଭ୍ରାନ୍ତିକର ତଥ୍ୟ ବା ‘ଡିପଫେକ୍’ ଉପରେ ରୋକ୍ ଲଗାଯାଇପାରିବ।
ନୂଆ ନିୟମ ଅନୁଯାୟୀ:
୧. ସୋସିଆଲ ମିଡିଆ ପାଇଁ ବାଧ୍ୟତାମୂଳକ ଲେବଲ୍: ସମସ୍ତ ସୋସିଆଲ ମିଡିଆ ପ୍ଲାଟଫର୍ମକୁ (ଯେପରିକି ଫେସବୁକ, ଇନଷ୍ଟାଗ୍ରାମ, ଏକ୍ସ) ଏଆଇ ଦ୍ୱାରା ପ୍ରସ୍ତୁତ ପୋଷ୍ଟଗୁଡିକରେ ସ୍ପଷ୍ଟ ଭାବରେ ‘AI-Generated’ ଲେବଲ୍ ଲଗାଇବାକୁ ପଡିବ।
୨. ଉପଭୋକ୍ତାଙ୍କ ପାଇଁ ଘୋଷଣାନାମା: ଯଦି କୌଣସି ବ୍ୟକ୍ତି ଏଆଇ ବ୍ୟବହାର କରି କୌଣସି ଫଟୋ, ଭିଡିଓ କିମ୍ବା ଅଡିଓ ପ୍ରସ୍ତୁତ କରୁଛନ୍ତି, ତେବେ ପୋଷ୍ଟ କରିବା ସମୟରେ ସେମାନଙ୍କୁ ଏହା ଏଆଇ ଦ୍ୱାରା ନିର୍ମିତ ବୋଲି ଘୋଷଣା କରିବାକୁ ହେବ।
୩. ଯାଞ୍ଚ ଦାୟିତ୍ୱ ପ୍ଲାଟଫର୍ମର: ବ୍ୟବହାରକାରୀଙ୍କ ଦ୍ୱାରା ଦିଆଯାଇଥିବା ସୂଚନା ସଠିକ କି ନୁହେଁ, ତାହା ଯାଞ୍ଚ କରିବା ଦାୟିତ୍ୱ ସମ୍ପୃକ୍ତ ସୋସିଆଲ ମିଡିଆ କମ୍ପାନୀର ରହିବ।
୪. ସ୍ପଷ୍ଟ ପ୍ରଦର୍ଶନ: ଏଆଇ ଲେବଲ୍ଟି ଏପରି ଭାବରେ ପ୍ରଦର୍ଶିତ ହେବା ଉଚିତ ଯେପରି ସାଧାରଣ ଜନତା ସହଜରେ ଜାଣିପାରିବେ ଯେ ଏହା ପ୍ରକୃତ ନୁହେଁ ବରଂ ଏଆଇ ଦ୍ୱାରା ପ୍ରସ୍ତୁତ।
୫. ବିନା ଲେବଲ୍ରେ ନୋ-ଏଣ୍ଟ୍ରି: କୌଣସି ବି ଏଆଇ କଣ୍ଟେଣ୍ଟ ବିନା ଲେବଲ୍ କିମ୍ବା ବିନା ସୂଚନାରେ ପ୍ଲାଟଫର୍ମରେ ପ୍ରକାଶିତ ହୋଇପାରିବ ନାହିଁ।
ସୂଚନାଯୋଗ୍ୟ ଯେ, ଗତ କିଛି ଦିନ ହେବ ସେଲିବ୍ରିଟି ଏବଂ ରାଜନେତାମାନଙ୍କର ଅନେକ ‘ଡିପଫେକ୍’ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି, ଯାହାକୁ ନେଇ ସରକାର ଚିନ୍ତା ପ୍ରକଟ କରିଥିଲେ। ଏହି ନୂଆ ନିୟମ ଦ୍ୱାରା ଗୁଜବ ଏବଂ ଭୁଲ ତଥ୍ୟ ପ୍ରସାରଣ ଉପରେ ଲଗାମ ଲଗାଯାଇପାରିବ ବୋଲି ଆଶା କରାଯାଉଛି।
