ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଭୁବନେଶ୍ୱରରେ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ର ୧୬୯ କୋଟି ଟଙ୍କା ବ୍ୟୟରେ ନିର୍ମିତ ଡାଟା ସେଣ୍ଟର ଏବଂ ସାଇବର ସୁରକ୍ଷା ତାଲିମ ପ୍ରତିଷ୍ଠାନକୁ ଆନୁଷ୍ଠାନିକ ଭାବେ ଉଦ୍ଘାଟନ କରିଛନ୍ତି। ଜଟଣୀସ୍ଥିତ ଇନଫୋଭ୍ୟାଲି-୨ରେ ପ୍ରତିଷ୍ଠିତ ଆରବିଆଇର ଏହି ଅତ୍ୟାଧୁନିକ ଡାଟା ସେଣ୍ଟର ଏବଂ ସାଇବର ସୁରକ୍ଷା ତାଲିମ ପ୍ରତିଷ୍ଠାନଟି ପ୍ରାୟ ୧୮.୫୫ ଏକର ପରିମିତ ଜମିରେ ବିସ୍ତାରିତ ହୋଇ ରହିଛି। ସୂଚନାଯୋଗ୍ୟ ଯେ, ତତ୍କାଳୀନ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ୨୦୨୩ ମସିହା ମାର୍ଚ୍ଚ ୨୨ ତାରିଖରେ ଏହି ମହତ୍ତ୍ୱାକାଂକ୍ଷୀ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ।
ଏହି ନୂତନ ଡାଟା ସେଣ୍ଟରଟି ଅନ୍ୟାନ୍ୟ ପ୍ରମୁଖ ପଦକ୍ଷେପ ସହିତ ଦେଶର ମିଶନ କ୍ରିଟିକାଲ୍ ପେମେଣ୍ଟ ତଥା ସମାଧାନ ପ୍ରଣାଳୀ (Settlement Systems) ସୁରୁଖୁରୁରେ ଉପଲବ୍ଧ କରାଇବ। ଏହା ଡିଜିଟାଲ୍ ଆର୍ଥିକ ସେବାର ପହଞ୍ଚ, କାର୍ଯ୍ୟଦକ୍ଷତା ଏବଂ ଗ୍ରାହକୀୟ ଭରସାକୁ ସାରା ଦେଶରେ ଆହୁରି ସମ୍ପ୍ରସାରିତ କରିବାରେ ବେଶ୍ ସହାୟକ ହେବ। ଏକ ଦୃଢ଼ ତଥା ସୁରକ୍ଷିତ ଡିଜିଟାଲ୍ ଭିତ୍ତିଭୂମି ଗଠନ କରି ଏହି କେନ୍ଦ୍ର ଭାରତର ଦ୍ରୁତ ବର୍ଦ୍ଧିଷ୍ଣୁ ପ୍ରଯୁକ୍ତିବିଦ୍ୟା-ଚାଳିତ ଆର୍ଥିକ ଅର୍ଥନୀତି (Financial Economy)ର ଅଭିବୃଦ୍ଧିକୁ ଆହୁରି ତ୍ୱରାନ୍ୱିତ କରିପାରିବ।
ସେହିପରି ପ୍ରତିଷ୍ଠାନ ପରିସରରେ ଥିବା ସାଇବର ସିକ୍ୟୁରିଟି ତାଲିମ ପ୍ରତିଷ୍ଠାନଟି ବ୍ୟାଙ୍କିଙ୍ଗ୍ କ୍ଷେତ୍ରରେ ଦକ୍ଷତା ନିର୍ମାଣକୁ ବହୁଗୁଣିତ କରିବ। ଏହା ସାଇବର ସୁରକ୍ଷା ତଥା ଏଣ୍ଟରପ୍ରାଇଜ୍-ପ୍ରଯୁକ୍ତିବିଦ୍ୟା ସମ୍ବନ୍ଧୀୟ ଉଚ୍ଚମାନର ତାଲିମ, ନୂତନ ଗବେଷଣା ଏବଂ କ୍ଷେତ୍ରସ୍ତରୀୟ ବ୍ୟବହାରିକ ଦକ୍ଷତା ବିକାଶ ନିମନ୍ତେ ଏକ ସମର୍ପିତ ସଂସ୍ଥାଗତ ପ୍ଲାଟଫର୍ମ ପ୍ରଦାନ କରିବ। ଏହି କେନ୍ଦ୍ର ପ୍ରତିଷ୍ଠା ସମ୍ପର୍କରେ ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଭୌଗୋଳିକ ସ୍ଥିରତା, ଭୂକମ୍ପ ପ୍ରବଣ କ୍ଷେତ୍ରରୁ ବାହାରେ ଅବସ୍ଥିତ ହେବା ଏବଂ ଉଚ୍ଚ ବିପଦପୂର୍ଣ୍ଣ ଅନ୍ତର୍ଜାତୀୟ ସୀମାନ୍ତ ଅଞ୍ଚଳରୁ ଯଥେଷ୍ଟ ଦୂରତା ଦୃଷ୍ଟିରୁ ହିଁ ଓଡ଼ିଶାର ଏହି ସ୍ଥାନକୁ ଚୟନ କରାଯାଇଛି।
ଏହି ବର୍ଣ୍ଣାଢ଼୍ୟ କାର୍ଯ୍ୟକ୍ରମରେ ଓଡ଼ିଶାର ରାଜ୍ୟପାଳ ବ୍ରଜମୋହନ ରାମ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ, କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ, ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଏବଂ ସାଂସଦ ମନମୋହନ ସାମଲଙ୍କ ସମେତ ବହୁ ବିଶିଷ୍ଟ ବ୍ୟକ୍ତିବିଶେଷ ଉପସ୍ଥିତ ଥିଲେ।
