କାନପୁର: ମାତ୍ର ୧୨ ଘଣ୍ଟା ମଧ୍ୟରେ ଦେଶରେ ଦୁଇଟି ପୃଥକ୍ ରେଳ ଦୁର୍ଘଟଣା ସାମ୍ନାକୁ ଆସିଛି। ବୁଧବାର ସକାଳେ ଆସାମର ଗୁଆହାଟୀ ନିକଟସ୍ଥ ଡିଗାରୁ ରେଳ ଷ୍ଟେସନରେ କୋଲକାତାରୁ ମିଜୋରାମର ସାଇରାଙ୍ଗ ଯାଉଥିବା ଏକ ଯାତ୍ରୀବାହୀ ଟ୍ରେନର ଇଞ୍ଜିନ ସମେତ ୫ଟି ବଗି ଲାଇନଚ୍ୟୁତ ହୋଇଥିଲା। ସେହିପରି ସନ୍ଧ୍ୟାରେ ଉତ୍ତରପ୍ରଦେଶର କାନପୁରଠାରେ ଚୌରୀଚୌରା ଏକ୍ସପ୍ରେସ୍ ମଧ୍ୟ ଲାଇନଚ୍ୟୁତ ହୋଇଥିବା ଜଣାପଡ଼ିଛି।
ପ୍ରାପ୍ତ ସୂଚନା ଅନୁଯାୟୀ, କାନପୁର ସେଣ୍ଟ୍ରାଲ ରେଳ ଷ୍ଟେସନରେ ବୁଧବାର ସନ୍ଧ୍ୟାରେ ଚୌରୀଚୌରା ଏକ୍ସପ୍ରେସର ୪ଟି ବଗି ଧାରଣାରୁ ଖସିଯାଇଥିଲା। ଟ୍ରେନଟି ପ୍ଲାଟଫର୍ମ ନମ୍ବର ୭ରୁ ଗୋରଖପୁର ଅଭିମୁଖେ ଯାତ୍ରା ଆରମ୍ଭ କରୁଥିବା ସମୟରେ ହଠାତ୍ ଲାଇନଚ୍ୟୁତ ହୋଇପଡ଼ିଥିଲା। ତେବେ ସେହି ସମୟରେ ଟ୍ରେନର ଗତି ଅତ୍ୟନ୍ତ କମ୍ ଥିବାରୁ ଏକ ବଡ଼ ଧରଣର ସମ୍ଭାବ୍ୟ ଦୁର୍ଘଟଣା ଟଳିଯାଇଛି। ସୌଭାଗ୍ୟବଶତଃ ଏଥିରେ କୌଣସି ଯାତ୍ରୀ ଆହତ ହୋଇଥିବାର ଖବର ମିଳିନାହିଁ।
ଚୌରୀଚୌରା ଏକ୍ସପ୍ରେସ୍ ବୁଧବାର ସନ୍ଧ୍ୟାରେ କାନପୁର ଅନୱରଗଞ୍ଜରୁ ନିଜ ଯାତ୍ରା ଆରମ୍ଭ କରିଥିଲା। ସନ୍ଧ୍ୟା ପ୍ରାୟ ୫ଟା ୦୫ ମିନିଟରେ ଏହା କାନପୁର ସେଣ୍ଟ୍ରାଲ ଷ୍ଟେସନର ପ୍ଲାଟଫର୍ମ ନମ୍ବର ୭ରେ ଆସି ପହଞ୍ଚିଥିଲା। ସେଠାରେ ପ୍ରାୟ ୧୦ ମିନିଟ୍ ରହିବା ପରେ ଟ୍ରେନଟି ଗୋରଖପୁର ଅଭିମୁଖେ ଯାତ୍ରା ଆରମ୍ଭ କରୁଥିଲା। ଠିକ୍ ଏହି ସମୟରେ ଟ୍ରେନର ଏସି ଥ୍ରୀ-ଟାୟାର ଶ୍ରେଣୀର ତିନୋଟି ବଗି ଯଥା ବି-୪, ବି-୫ ଏବଂ ବି-୬ ରେଳ ଧାରଣାରୁ ତଳକୁ ଖସିଯାଇଥିଲା। ବଗିରେ ଥିବା ଯାତ୍ରୀମାନେ କିଛି ବୁଝିବା ପୂର୍ବରୁ ସମଗ୍ର ପ୍ଲାଟଫର୍ମରେ ଭୟ ଓ ଆତଙ୍କ ଖେଳିଯାଇଥିଲା। ଫଳରେ ଟ୍ରେନକୁ ଅପେକ୍ଷା କରିଥିବା ଯାତ୍ରୀ ତଥା ଉପସ୍ଥିତ ଅନ୍ୟ ଲୋକଙ୍କ ମଧ୍ୟରେ ତୀବ୍ର ହଇଚଇ ଓ ଆଲୋଡ଼ନ ସୃଷ୍ଟି ହୋଇଥିଲା। ତୁରନ୍ତ ରେଳବାଇ ଅଧିକାରୀ ଓ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବାହାର କରିଥିଲେ। ଏହା ସହିତ ଲାଇନଚ୍ୟୁତ ହୋଇଥିବା ବଗିଗୁଡ଼ିକୁ ପୁନର୍ବାର ଟ୍ରାକକୁ ଅଣାଯିବା ପରେ ଉକ୍ତ ରୁଟ୍ରେ ରେଳ ଚଳାଚଳ ସ୍ୱାଭାବିକ ହୋଇଥିଲା।
ଅନ୍ୟପକ୍ଷରେ, ବୁଧବାର ସକାଳେ ଗୁଆହାଟୀ ନିକଟସ୍ଥ ଡିଗାରୁ ଷ୍ଟେସନରେ ସାଇରାଙ୍ଗ-କୋଲକାତା ଏକ୍ସପ୍ରେସର ଇଞ୍ଜିନ ସମେତ ୫ଟି ବଗି ଲାଇନଚ୍ୟୁତ ହୋଇଯାଇଥିଲା। ଏହି ଅଘଟଣରେ ପ୍ରାୟ ୪ ଜଣ ଯାତ୍ରୀ ସାମାନ୍ୟ ଆହତ ହୋଇଥିବା ଖବର ମିଳିଛି। ଉତ୍ତର-ପୂର୍ବ ସୀମାନ୍ତ ରେଳବାଇର ଜଣେ ବରିଷ୍ଠ ମୁଖପାତ୍ରଙ୍କ ସୂଚନା ଅନୁସାରେ, ଅନ୍ୟ ଏକ ଟ୍ରେନକୁ ରାସ୍ତା ଛାଡ଼ିଦେବା ପାଇଁ ଏହି ଏକ୍ସପ୍ରେସକୁ ଡିଗାରୁ ଷ୍ଟେସନରେ ଅଟକିବାକୁ ନିର୍ଦ୍ଦେଶ ଦିଆଯାଇଥିଲା। ମାତ୍ର ଲୋକୋ ପାଇଲଟ୍ ଟ୍ରେନର ଗତିକୁ ସଠିକ୍ ସମୟରେ ନିୟନ୍ତ୍ରଣ କରିପାରି ନଥିବାରୁ ଏହି ଅଘଟଣ ଘଟିଥିବା ଜଣାପଡ଼ିଛି।
