ନୂଆଦିଲ୍ଲୀ: କ୍ୟାନ୍ସର, ଆଲଜାଇମର୍ସ, ହୃଦରୋଗ ଏବଂ ମାନସିକ ଅସୁସ୍ଥତା ଭଳି ମାରାତ୍ମକ ବ୍ୟାଧି ଆଗାମୀ ୧୦ ବର୍ଷ ମଧ୍ୟରେ ଇତିହାସ ପାଲଟିଯିବ। କୃତ୍ରିମ ବୁଦ୍ଧିମତ୍ତା ବା ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)ର ସହାୟତାରେ ଏହିସବୁ ଗମ୍ଭୀର ରୋଗର ସ୍ଥାୟୀ ଚିକିତ୍ସା ସମ୍ଭବ ହୋଇପାରିବ ବୋଲି ଆଶା କରାଯାଉଛି। ଫଳରେ ଆଗାମୀ ଏକ ଦଶନ୍ଧି ମଧ୍ୟରେ ଚିକିତ୍ସା ବିଜ୍ଞାନ କ୍ଷେତ୍ରରେ ଏକ ଯୁଗାନ୍ତକାରୀ ପରିବର୍ତ୍ତନ ଆସିପାରେ। ପ୍ରମୁଖ ଏଆଇ କମ୍ପାନୀ ଆନ୍ଥ୍ରୋପିକର ସିଇଓ ଡାରିଓ ଆମୋଡେଇ ଏଭଳି ବଡ଼ ଆଶା ପ୍ରକାଶ କରିଛନ୍ତି। ତେବେ ତାଙ୍କର ଏହି ଦାବିକୁ ନେଇ ବିଶ୍ୱସ୍ତରୀୟ ଔଷଧ ନିର୍ମାତା କମ୍ପାନୀ ଓ ଚିକିତ୍ସା ବିଜ୍ଞାନୀମାନେ ଏତେଟା ସହଜରେ ଆଶାବାଦୀ ହୋଇପାରୁ ନାହାନ୍ତି।
ଏନଡିଟିଭି ରିପୋର୍ଟ ଅନୁସାରେ, ଆମୋଡେଇ କହିଛନ୍ତି ଯେ ଯଦି ଆମେ କୃତ୍ରିମ ବୁଦ୍ଧିମତ୍ତାର ସଠିକ୍ ଓ ଦୂରଦୃଷ୍ଟିସମ୍ପନ୍ନ ଉପଯୋଗ କରିପାରିବା, ତେବେ ସମଗ୍ର ମାନବ ସମାଜ ଏକ ନୂତନ ଯୁଗରେ ପ୍ରବେଶ କରିପାରିବ। ଯେଉଁ ଜଟିଳ ସମସ୍ୟାଗୁଡ଼ିକର ସମାଧାନ ହଜାର ହଜାର ବର୍ଷ ଧରି ମିଳିପାରିନାହିଁ, ଏଆଇ ବଳରେ ସେଗୁଡ଼ିକର ସମାଧାନ ମଧ୍ୟ ସହଜରେ ସମ୍ଭବ ହୋଇପାରିବ। ତାଙ୍କ ମତରେ, ଏଆଇ ପ୍ରଯୁକ୍ତିବିଦ୍ୟା ଜୈବିକ ଗବେଷଣା, ନୂତନ ଔଷଧର ଆବିଷ୍କାର ଏବଂ ସମଗ୍ର ଚିକିତ୍ସା ବିଜ୍ଞାନରେ ନୂଆ ଉଦ୍ଭାବନର ଗତିକୁ ଅନେକ ଗୁଣ ବୃଦ୍ଧି କରିପାରିବ।
ଏଆଇର ଏଭଳି ବିପୁଳ ସମ୍ଭାବନାକୁ ନେଇ କେବଳ ଆମୋଡେଇ ନୁହନ୍ତି, ବରଂ ଅନ୍ୟ ପ୍ରମୁଖ ଟେକ୍ନୋଲୋଜି ଉଦ୍ୟୋଗୀମାନେ ମଧ୍ୟ ଉତ୍ସାହ ପ୍ରକାଶ କରିଛନ୍ତି। ଏହି ଧାରାରେ ଟେସଲା ମୁଖ୍ୟ ଏଲନ୍ ମସ୍କ ଏବଂ ଗୁଗଲର ଏଆଇ ବିଭାଗ (ଗୁଗଲ ଡିପ୍ମାଇଣ୍ଡ)ର ମୁଖ୍ୟ ଡେମିସ୍ ହାସାବିସ୍ ମଧ୍ୟ ସାମିଲ ଅଛନ୍ତି। ହାସାବିସଙ୍କ ମତରେ, ଏଆଇର ସହାୟତାରେ ନୂଆ ଔଷଧ ଆବିଷ୍କାର ପାଇଁ ପାରମ୍ପରିକ ଭାବେ ଲାଗୁଥିବା ପ୍ରାୟ ୧୦ ବର୍ଷର ଦୀର୍ଘ ସମୟକୁ ମାତ୍ର କିଛି ସପ୍ତାହକୁ ହ୍ରାସ କରାଯାଇପାରିବ। ଏହାଦ୍ୱାରା ଆଗାମୀ ଏକ ଦଶନ୍ଧି ମଧ୍ୟରେ ଅନେକ ଅସାଧ୍ୟ ରୋଗର ସଫଳ ଚିକିତ୍ସା ମିଳିବାର ବାସ୍ତବ ସମ୍ଭାବନା ସୃଷ୍ଟି ହୋଇଛି।
ଏଥିପାଇଁ ସେ ଗୁଗଲର କ୍ରାନ୍ତିକାରୀ ‘ଆଲଫାଫୋଲ୍ଡ’ ମଡେଲର ଉଦାହରଣ ଦେଇଛନ୍ତି। ଏହି ଏଆଇ ଟେକ୍ନୋଲୋଜି ୨୦ କୋଟିରୁ ଅଧିକ ଜୈବିକ ପ୍ରୋଟିନର ଜଟିଳ ଗଠନକୁ ଚିହ୍ନଟ ଓ ସଠିକ୍ ଭାବେ ମ୍ୟାପ୍ କରିବାରେ ବୈଜ୍ଞାନିକମାନଙ୍କୁ ସହାୟତା କରିଛି। ଏହା ନିଶ୍ଚିତ ଭାବରେ ଆଧୁନିକ ଜୀବବିଜ୍ଞାନ କ୍ଷେତ୍ରରେ ଏକ ଐତିହାସିକ ସଫଳତା। କିନ୍ତୁ ଏହାର ଅର୍ଥ ଏହା ନୁହେଁ ଯେ ଆଗାମୀ ୧୦ ବର୍ଷ ମଧ୍ୟରେ ଏଆଇ କ୍ୟାନ୍ସର କିମ୍ବା ଆଲଜାଇମର୍ସ ଭଳି ଅତ୍ୟନ୍ତ ଜଟିଳ ଓ ପରିବର୍ତ୍ତନଶୀଳ ରୋଗଗୁଡ଼ିକର ସମ୍ପୂର୍ଣ୍ଣ ଚିକିତ୍ସା ଖୋଜି ବାହାର କରିଦେବ।
ଅନ୍ୟପକ୍ଷରେ, ପ୍ରମୁଖ ଔଷଧ ନିର୍ମାତାମାନଙ୍କ ମତରେ ଏଆଇ ସହାୟତାରେ ଔଷଧ ପ୍ରସ୍ତୁତି ପାଇଁ ଆବଶ୍ୟକ ହେଉଥିବା ପ୍ରାରମ୍ଭିକ ଗବେଷଣାର ସମୟ ହୁଏତ କମିପାରେ। କିନ୍ତୁ ଏଥିପାଇଁ ଆବଶ୍ୟକ ବିଭିନ୍ନ ପର୍ଯ୍ୟାୟର କ୍ଲିନିକାଲ୍ ଟ୍ରାଏଲ୍, ବିଭିନ୍ନ ଅନ୍ତର୍ଜାତୀୟ ନିୟାମକ ସଂସ୍ଥାର କଠୋର ଅନୁମୋଦନ ଏବଂ ପ୍ରାଥମିକ ଭାବେ ଜୀବଜନ୍ତୁ ଓ ପରବର୍ତ୍ତୀ ସମୟରେ ମଣିଷଙ୍କ ଉପରେ ହେଉଥିବା ପରୀକ୍ଷା ନିରୀକ୍ଷାକୁ କୌଣସି ପରିସ୍ଥିତିରେ ବି ଏଡ଼ାଇ ହେବ ନାହିଁ। ସାଧାରଣତଃ ଗୋଟିଏ ନୂଆ ଔଷଧ ବଜାରକୁ ଆଣିବା ପାଇଁ ସମ୍ପୂର୍ଣ୍ଣ ବିକାଶ ପ୍ରକ୍ରିୟାରେ ପ୍ରାୟ ୧୦ରୁ ୧୨ ବର୍ଷ ସମୟ ଲାଗିଥାଏ। କମ୍ପ୍ୟୁଟର ପରଦାରେ କୌଣସି ଔଷଧୀୟ ଅଣୁ ବା ମଲିକ୍ୟୁଲ୍ ଉପଯୋଗୀ ଦେଖାଯିବା ହିଁ ଯଥେଷ୍ଟ ନୁହେଁ। ଏହାକୁ ପ୍ରଥମେ ଲାବୋରେଟୋରୀରେ, ପରେ ପରୀକ୍ଷାଗାରର ଜୀବଜନ୍ତୁଙ୍କ ଉପରେ ଏବଂ ଶେଷରେ ମଣିଷ ଶରୀରରେ ବହୁସ୍ତରୀୟ ପରୀକ୍ଷା କରିବାକୁ ପଡ଼ିଥାଏ। ଏହି ଦୀର୍ଘ ପ୍ରକ୍ରିୟା ଦ୍ୱାରା ହିଁ ପ୍ରସ୍ତୁତ ଔଷଧଟି ମାନବ ଶରୀର ପାଇଁ କେତେ ସୁରକ୍ଷିତ ଏବଂ ପ୍ରକୃତରେ ରୋଗ ଉପଶମରେ କେତେଦୂର କାମ କରୁଛି, ତାହା ସ୍ପଷ୍ଟ ଭାବେ ପ୍ରମାଣିତ ହୋଇଥାଏ।
