ନୂଆଦିଲ୍ଲ : ଦିଲ୍ଲୀର ଯନ୍ତରମନ୍ତରରୁ ଶୁଭିଛି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି। ଯନ୍ତରମନ୍ତରେ ବିଶାଳ ବିକ୍ଷୋଭ ପ୍ରଦର୍ଶନ କରି ଧର୍ମେନ୍ଦ୍ରଙ୍କ ଇସ୍ତଫା ଦାବି କରିଛି କକ୍ରୋଚ ଜନତା ପାର୍ଟି। ଯୁବଗୋଷ୍ଠୀଙ୍କ ଦ୍ୱାରା ସୋଶାଲ ମିଡିଆରୁ ଆରମ୍ଭ ହୋଇଥିବା ଏହି ସଂଗଠନର ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ଦେଇଛି ରଣହୁଙ୍କାର। ହଜାର ହଜାର ଯୁବକ ଓ ଯୁବତୀ ବିକ୍ଷୋଭରେ ସାମିଲ ହୋଇ ଭୁଶୁଡ଼ି ପଡ଼ିଥିବା ଶିକ୍ଷା ବ୍ୟବସ୍ଥା ପାଇଁ ସିଧାସଳଖ ଧର୍ମେନ୍ଦ୍ର ପ୍ରଧାନଙ୍କୁ ଦାୟୀ କରିଛନ୍ତି।
କକ୍ରୋଚ ଜନତା ପାର୍ଟିର ପ୍ରତିଷ୍ଠାତା ଅଭିଜିତ ଦିପକେ ନିଜେ ଜୟ ଭୀମ ନାରା ଦେଇ ଯନ୍ତରମନ୍ତରରେ ଗର୍ଜନ କରିଛନ୍ତି। ଏହି ଦେଶର ଯୁଗୋଷ୍ଠୀଙ୍କୁ ଆଉ ଭୟଭୀତ ହେବାର ନାହିଁ। ସେମାନେ ଲଢ଼େଇ କରିବେ। କକ୍ରୋଚମାନେ ଆଦୌ ଡରନ୍ତି ନାହିଁ। ସେମାନେ କେବେ ହେଲେ ପ୍ରାଣ ହରାନ୍ତି ନାହିଁ। ଦେଶର ଭବିଷ୍ୟତ ପିଢ଼ିଙ୍କ ସୁରକ୍ଷା ପାଇଁ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଇସ୍ତଫା ଦେବାକୁ ପଡ଼ିବ ବୋଲି ଅଭିଜିତ କହିଛନ୍ତି।
କକ୍ରୋଚ ଜନତା ପାର୍ଟି କହିଛି ଯେ “ଆମେ ଶିକ୍ଷା ମନ୍ତ୍ରୀଙ୍କୁ ନିର୍ବାଚିତ କରିଥିଲୁ ଓ ତାଙ୍କୁ ସେଠାକୁ ପଠାଇଥିଲୁ। ସେ ଆମ ଟିକସରୁ ଦରମା ପାଉଛନ୍ତି। ତାଙ୍କ କାର୍ଯ୍ୟକାଳ ସମୟରେ ଲକ୍ଷାଧିକ ଯୁବଗୋଷ୍ଠୀଙ୍କ ଭାଗ୍ୟ ଅନ୍ଧକାର ମଧ୍ୟକୁ ଚାଲି ଯାଇଛି। ଏବେ କୋକ୍ରଚମାନେ ଆସୁଛନ୍ତି, ଧର୍ମେନ୍ଦ୍ର ପ୍ରଧାନ ଯାଉଛନ୍ତି।”
ଆଜି ଦିନ ୫ଟା ଯାଏ କକ୍ରୋଚ ଜନତା ପାର୍ଟି ବିକ୍ଷୋଭ ପ୍ରଦର୍ଶନ କରିବ। ଏହାପରେ ବି ଯଦି ଧର୍ମେନ୍ଦ୍ର ପ୍ରଧାନ ଇସ୍ତଫା ଦେବେ ନାହିଁ, ତା’ହେଲେ ସଂଗଠନ ପୁଣି ରାସ୍ତାକୁ ଓହ୍ଲାଇବ। ଆସନ୍ତା ଜୁନ ୨୩ରେ ସିଜେପି ଦିଲ୍ଲୀର ରାମଲୀଳା ମୈଦାନରେ ବିକ୍ଷୋଭ ସମାବେଶ କରିବ ବୋଲି ସଙ୍କେତ ଦେଇଛି।
ଅନ୍ୟପକ୍ଷରେ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ଆରମ୍ଭ ହୋଇଥିବା ଏହି ବିଶାଳ ବିକ୍ଷୋଭ ସମାବେଶକୁ ଦିଲ୍ଲୀ ପୁଲିସ ମଧ୍ୟ ଅନୁମତି ଦେଇଛି। ବିକ୍ଷୋଭ ଆରମ୍ଭ କରିବା ପୂର୍ବରୁ କକ୍ରୋଚ ଜନତା ପାର୍ଟି ପକ୍ଷରୁ ଦିଲ୍ଲୀ ପୁଲିସ୍କୁ ଅନୁମତି ମଗାଯାଇଥିଲା। ପୁଲିସ୍ ଦିନ ୧୦ଟାରୁ ଅପରାହ୍ନ ୫ଟାରେ ଶାନ୍ତିପୂର୍ଣ୍ଣ ବିକ୍ଷୋଭ ପାଇଁ ସଂଗଠନକୁ ଅନୁମତି ଦେଇଛି। ଏହାପରେ ହଜାର ହଜାର ଯୁବକଯୁବତୀ କକ୍ରୋଚ ଜନତା ପାର୍ଟି ବା ସିଜେପି ବ୍ୟାନର ତଳେ ଯନ୍ତରମନ୍ତର ଠାରେ ବିକ୍ଷୋଭ ପ୍ରଦର୍ଶନ କରୁଛନ୍ତି।
ନିଟ୍ ପରୀକ୍ଷାରେ ଅନିୟମିତତା, ପ୍ରଶ୍ନପତ୍ର ଲିକ୍ ଓ ସିବିଏସଇ ପରୀକ୍ଷାରେ ହୋଇଥିବା ତ୍ରୁଟି ଲକ୍ଷାଧିକ ଶିକ୍ଷାର୍ଥୀଙ୍କ ଭବିଷ୍ୟତକୁ ଅନିଶ୍ଚିତତା ମଧ୍ୟକୁ ଠେଲି ଦେଇଛି। ଏଥିପାଇଁ ସୋଶାଲ ମିଡିଆରୁ ଆରମ୍ଭ ହୋଇଥିବା ଏହି ଯୁବ ଆନ୍ଦୋଳନ ଗତ କିଛି ସପ୍ତାହ ମଧ୍ୟରେ ଦେଶବ୍ୟାପୀ ଚର୍ଚ୍ଚାର ବିଷୟ ପାଲଟିଛି। ସଂଗଠନର ପ୍ରତିଷ୍ଠାତା ଅଭିଜିତ ଆଜି ଆମେରିକାରୁ ଭାରତ ଫେରି ଏହି ପ୍ରତିବାଦର ନେତୃତ୍ୱ ନେଉଛନ୍ତି।
ବିକ୍ଷୋଭକାରୀ ଅଭିଯୋଗ କରିଛନ୍ତି ଯେ ଗତ କିଛି ମାସ ଧରି ବିଭିନ୍ନ ଜାତୀୟ ପରୀକ୍ଷାରେ ଅନିୟମିତତା, ପ୍ରଶ୍ନପତ୍ର ଲିକ୍ ଓ ପରୀକ୍ଷା ପରିଚାଳନାରେ ତ୍ରୁଟି ଛାତ୍ରଛାତ୍ରୀଙ୍କ ଭବିଷ୍ୟତକୁ ପ୍ରଭାବିତ କରିଛି। ଏଥିପାଇଁ ଶିକ୍ଷା ମନ୍ତ୍ରଣାଳୟକୁ ଦାୟୀ କରି ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରୁଛନ୍ତି।
ବିକ୍ଷୋଭ ସମୟରେ “ଧର୍ମେନ୍ଦ୍ର ପ୍ରଧାନ ଇସ୍ତଫା ଦିଅ” ଓ “ଛାତ୍ରଙ୍କୁ ନ୍ୟାୟ ଦିଅ” ଭଳି ନାରା ଶୁଣିବାକୁ ମିଳିଛି। କିଛି ବିକ୍ଷୋଭକାରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ମଧ୍ୟ ସ୍ଲୋଗାନ ଦେଇଛନ୍ତି। ଯୁଗୋଷ୍ଠୀର ଏହି ଆନ୍ଦୋଳନକୁ ବିଭିନ୍ନ ବିରୋଧୀ ଦଳଙ୍କ ସମେତ ସାମାଜିକ କର୍ମୀ ସୋନମ ୱାଙ୍ଗଚୁକଙ୍କ ସମର୍ଥନ ମିଳିଛି।
