କୋଲକାତା,୧୨/୧୦: ପଶ୍ଚିମବଙ୍ଗର ଦୁର୍ଗାପୁରସ୍ଥିତ ଏକ ଘରୋଇ ମେଡିକାଲ୍ କଲେଜର ଦ୍ୱିତୀୟ ବର୍ଷ ଛାତ୍ରୀ ତଥା ଓଡ଼ିଶାର ଜଳେଶ୍ୱର ଅଞ୍ଚଳର ୨୩ ବର୍ଷୀୟ ଯୁବତୀଙ୍କୁ ଗଣବଳାତ୍କାର ଘଟଣା ପରେ ରାଜ୍ୟ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବିବାଦୀୟ ମନ୍ତବ୍ୟ ଦେଇଛନ୍ତି। ମୁଖ୍ୟମନ୍ତ୍ରୀ ଝିଅମାନଙ୍କୁ ରାତିରେ କଲେଜ ବାହାରକୁ ଯିବାକୁ ଅନୁମତି ନ ଦେବାକୁ ପରାମର୍ଶ ଦେଇ ଘରୋଇ କଲେଜଗୁଡ଼ିକର ଦାୟିତ୍ୱ ଉପରେ ଜୋର ଦେଇଛନ୍ତି, ଯାହାକୁ ଭାଜପା ପୀଡିତଙ୍କ ପ୍ରତି ଲଜ୍ଜା ବୋଲି ଅଭିହିତ କରିଛି।ଶୁକ୍ରବାର ରାତିରେ ଛାତ୍ରୀଜଣକ ତାଙ୍କ ଜଣେ ପୁରୁଷ ସାଙ୍ଗ ସହିତ କଲେଜ ବାହାରେ ଥିବା ବେଳେ କିଛି ଦୁର୍ବୃତ୍ତ ସେମାନଙ୍କୁ ଧରି ଜଙ୍ଗଲିଆ ଅଞ୍ଚଳକୁ ନେଇ ବଳାତ୍କାର କରିଥିଲେ। ଏହି ଘଟଣା ଆର୍.ଜି. କର୍ ମେଡିକାଲ୍ କଲେଜ ଘଟଣାର ଏକ ବର୍ଷ ପରେ ଘଟିଛି, ଯାହା ରାଜ୍ୟରେ ମହିଳା ସୁରକ୍ଷା ପ୍ରଶ୍ନ ଉଠାଇଛି।ତେବେ ଘଟଣା ପରେ ପ୍ରଥମ ମିଡିଆ ବୈଠକରେ ମୁଖ୍ୟମନ୍ତ୍ରୀ କହିଛନ୍ତି, “ସେ ଘରୋଇ ମେଡିକାଲ୍ କଲେଜରେ ପଢ଼ୁଥିଲେ। ଏହା କାହାର ଦାୟିତ୍ୱ? ରାତି ସାଢ଼େ ୧୨ଟାରେ କିପରି ବାହାରକୁ ଆସିଲେ?” ସେ କହିଛନ୍ତି ଯେ, ଝିଅମାନଙ୍କୁ ରାତିରେ କଲେଜ ବାହାରକୁ ଯିବାକୁ ଅନୁମତି ଦିଆଯିବା ଉଚିତ୍ ନୁହେଁ ଏବଂ ସେମାନେ ନିଜେ ନିଜକୁ ସୁରକ୍ଷିତ ରଖିବା ଆବଶ୍ୟକ। “ଏହା ଜଙ୍ଗଲିଆ ଅଞ୍ଚଳ। ଘରୋଇ କଲେଜଗୁଡ଼ିକ ଛାତ୍ରୀଙ୍କ ଦାୟିତ୍ୱ ଠିକ୍ ଭାବେ ନେବା ଦରକାର ଏବଂ ରାତିର ସଂସ୍କୃତି ଉପରେ ନଜର ରଖିବା ଉଚିତ୍,” ବୋଲି ସେ କହିଛନ୍ତି। ଏହା ସହିତ ଅନ୍ୟ ରାଜ୍ୟଗୁଡ଼ିକରେ ଘଟୁଥିବା ଏହିପରି ଘଟଣାକୁ ନିନ୍ଦନୀୟ ବୋଲି କହି ମଣିପୁର, ଉତ୍ତରପ୍ରଦେଶ, ବିହାର ଓ ଓଡ଼ିଶାରେ ଘଟିଥିବା ଘଟଣାର ଉଲ୍ଲେଖ କରିଛନ୍ତି। “ଓଡ଼ିଶାରେ ସମୁଦ୍ର କୂଳରେ ଝିଅମାନଙ୍କୁ ବଳାତ୍କାର ହୋଇଥିଲା। ସେଠାର ସରକାର କଣ କାର୍ଯ୍ୟାନୁଷ୍ଠାନ ନେଇଛନ୍ତି?” ବୋଲି ପ୍ରଶ୍ନ କରିଛନ୍ତି। ପୋଲିସ ସମସ୍ତ ଅଭିଯୁକ୍ତଙ୍କୁ ଧରିବ ଏବଂ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଆଶ୍ୱାସନ ଦେଇଛନ୍ତି।
