କଟକ : କଟକ ଓଏମପି (OMP-IV) ଠାରେ ‘ଆନ୍ତର୍ଜାତିକ ମାନବାଧିକାର ମଞ୍ଚ ନ୍ୟାୟ ଓ ସାମାଜିକ ସ୍ୱତନ୍ତ୍ରତା’ର ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଯାଇଛି। ଡକ୍ଟର ବୋମାଲିକାନ୍ତ ରାଉତଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ କଟକ ସମେତ ରାଜ୍ୟର ବିଭିନ୍ନ ଜିଲ୍ଲାରୁ ୫୦ରୁ ଉର୍ଦ୍ଧ୍ୱ କର୍ମକର୍ତ୍ତା ଓ ସଦସ୍ୟ ଯୋଗ ଦେଇଥିଲେ।
ଏହି ବୈଠକର ମୁଖ୍ୟ ଆଭିମୁଖ୍ୟ ଥିଲା ସମାଜର ଅତ୍ୟନ୍ତ ନିଷ୍ପେସିତ, ଅସହାୟ ଏବଂ ଆର୍ଥିକ ଅନାଟନ ମଧ୍ୟରେ ଥିବା ପୀଡ଼ିତଙ୍କୁ ସହାୟତାର ହାତ ବଢ଼ାଇବା। ସାଧାରଣ ଜନତା ନିଜର ଆଇନଗତ ଅଧିକାର ଓ ଶକ୍ତି ବିଷୟରେ ସଚେତନ ନଥିବାରୁ ଅନେକ ସମୟରେ ବିଭିନ୍ନ ସମସ୍ୟାର ସମ୍ମୁଖୀନ ହୁଅନ୍ତି। ଏଭଳି ପରିସ୍ଥିତିରେ ମାନବାଧିକାର ମଞ୍ଚର ସଦସ୍ୟମାନେ କିପରି ତୁରନ୍ତ ସେମାନଙ୍କ ପାଖରେ ପହଞ୍ଚି ଆଇନଗତ ସହାୟତା ଯୋଗାଇ ଦେବେ, ସେ ବିଷୟରେ ବିସ୍ତୃତ ଆଲୋଚନା କରାଯାଇଥିଲା।
ଏହି କାର୍ଯ୍ୟକ୍ରମରେ କଟକ-ଚୌଦ୍ୱାରର ପୂର୍ବତନ ବିଧାୟକ ଡକ୍ଟର ପ୍ରଭାତ ରଞ୍ଜନ ବିଶ୍ୱାଳ ଅତିଥି ଭାବେ ଯୋଗଦେଇ ସଂଗଠନର କାର୍ଯ୍ୟଧାରାକୁ ପ୍ରଶଂସା କରିବା ସହ ସଦସ୍ୟମାନଙ୍କ ମଧ୍ୟରେ ସମନ୍ୱୟ ରକ୍ଷା କରିବା ଉପରେ ଗୁରୁତ୍ୱାରୋପ କରିଥିଲେ। ସଂଘର କାର୍ଯ୍ୟାଳୟ ବର୍ତ୍ତମାନ ବାଙ୍ଗାଲୋର, କର୍ଣ୍ଣାଟକ ଓ ଭୁବନେଶ୍ୱରରେ ରହିଥିଲେ ହେଁ, କଟକରେ ଏକ ଶାଖା କାର୍ଯ୍ୟାଳୟ ଖୋଲିବା ପାଇଁ ଉପସ୍ଥିତ ସଦସ୍ୟମାନେ ମତ ପ୍ରକାଶ କରିଥିଲେ। ଏହାଦ୍ୱାରା ବିଭିନ୍ନ ଜିଲ୍ଲାର ପୀଡ଼ିତଙ୍କ ସହ ସମ୍ପର୍କ ସ୍ଥାପନ କରିବା ଅଧିକ ସହଜ ହେବ ବୋଲି ଆଶା କରାଯାଇଛି।
ସୁଜାତା ଗୋସ୍ୱାମୀ ଏବଂ ପ୍ରଦୀପ ରାଜଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ସଭାଟି ଅତ୍ୟନ୍ତ ଶାନ୍ତିଶୃଙ୍ଖଳାର ସହ ସମ୍ପନ୍ନ ହୋଇଥିଲା। ବୈଠକରେ ପ୍ରଦୀପ ରାଜ, ସୁଜାତା ଗୋସ୍ୱାମୀ, ଅକ୍ଷୟ ବାବୁ, ପ୍ରକାଶ କୁମାର ବେଉରା, ସନ୍ତୋଷ ଏବଂ ନନ୍ଦ ବାବୁ ପ୍ରମୁଖ ଉପସ୍ଥିତ ରହି ନୂତନ କର୍ମୀମାନଙ୍କୁ ସ୍ୱାଗତ କରିଥିଲେ। ଆଗାମୀ ଦିନରେ ଏହି ସଂଗଠନ ରାଜ୍ୟର ସମସ୍ତ ପୀଡ଼ିତା ଓ ଅସହାୟଙ୍କ ପାଇଁ ଏକ “ନୂଆ ଆଶାର କିରଣ” ସାଜିବ ବୋଲି ସଦସ୍ୟମାନେ ଦୃଢ଼ୋକ୍ତି ପ୍ରକାଶ କରିଥିଲେ।
